इटालीमा पुल भत्किँदा मृत्यु हुनेको संख्या ३८ पुग्यो

रोम- इटालीको उत्तरपश्चिमी बन्दरगाह शहर जेनोअमा एउटा पुल भत्किँदा मृत्यु हुनेको संख्या ३८ पुगेको छ । ए १० सडक अन्तर्गतको पुल भत्किएर रेलमार्गमा खस्दा उनीहरुको मृत्यु भएको अन्तर्राष्ट्रिय सञ्चार माध्यमले जनाएका छन् । 

दुर्घटनामा परी केही व्यक्तिहरु अझै हराइरहेको  इटालीको टेलिभिजन च्यानल स्काई टिजी २४ ले जानकारी गराएको छ । गम्भिर घाइते भएकाहरुको संख्या थुप्रै भएकाले मृतकको संख्या अझै बढ्न सक्ने इटालकिा उप–मन्त्री एडोआर्डो रिक्सीलाई उद्धृत गर्दै एएफपीले जनाएको छ ।

पुलको भग्नाबशेषमा परेको आशङ्कामा त्यसलाई हटाउने कार्य स्थानीय नागरिक र सुरक्षाकर्मीले संयुक्त रूपमा गरिरहेको मन्त्री रिक्सीले बताएका छन् । 'अहिलेसम्म ३८ जनाको मृत्यु भएको जानकारी प्राप्त भएको छ । गम्भिर विरामीको संख्या धेरै भएकाले मृतकको संख्या अझै बढ्न सक्छ ।' उपमन्त्री रिक्सीले भने । 

घटनास्थलमा पुगेका एएफपीका फोटो पत्रकारले भने पुल भत्किएसँगै केही कार र ट्रकहरू भग्नाबशेषमा फसेका छन् भने पुलबाट सिमेन्टले बनेका पथ्थरका ठूलाठूला टुक्राहरूले नजिकैका घरहरूमा समेत क्षति पुगेको बताइएको छ । इटालियाली सञ्चारमाध्यमका अनुसार मोरान्डी पुलको २०० मिटर भाग भत्किएको छ ।