लागूऔषध मुद्दाका अभियुक्त अदालत परिसरबाटै भागेपछि...

काठमाडौं- लागूऔषध मुद्दामा म्याद थपको लागि काठमाडौं जिल्ला अदालत पुर्‍याइएका अनिल ठाकुर आइतबार अदालत पुगाएको केही समयमै भागेका थिए।

तर, उनलाई प्रहरी भागेको केही समयमै पक्राउ गर्न सफल भएको छ। सप्तरी कचन गाउँपालिका-२ घर भएर काठमाडौं तिलगंगा बस्दै आएका २८ वर्षीय ठाकुरलाई प्रहरीले केही अन्तरालमै पक्राउ गरेको हो।

अदालतबाट भागेको सूचना ललितपुर र भक्तपुर प्रहरी इकाइ समेतलाई पठाइएको थियो। 

काठमाडौं प्रहरीका एसपी दिनेशराज मैनालीका अनुसार त्यसपछि उपत्यकाका प्रहरी सूक्ष्म तवरले सक्रिय भयो। सोही क्रममा नगर प्रहरी कार्यालय, भृकुटीमण्डप, प्रहरी वृत्त सिंहदरबार, जनसेवा, नयाँ बानेश्‍वर, गौशाला, दरबारमार्ग, कालीमाटी, थानकोट, प्रहरी प्रभाग कोटेश्‍वर, नागढुङ्गा र इप्रका फर्पिङ लगायतलाई विशेष तवरले परिचालन गराइएको थियो। 

त्यसलगत्तै जिल्ला प्रहरी परिसर काठमाडौंबाट विशेष प्रहरी इकाइलाई अनुसन्धानका विविध विधि र प्रविधिमार्फत अनुसन्धान गर्न खटाइएको थियो। 

जिल्ला प्रहरी परिसरको उक्त विशेष प्रहरी इकाइ र प्रहरी प्रभाग कोटेश्‍वरबाट संयुक्तरुपमा खटिएको प्रहरी टोलीले परिणामतः चेकजाँचको क्रममा राति साढे ८ बजे कोटेश्‍वरस्थित आकाशे पुल नजिकबाट ठाकुरलाई पुनः नियन्त्रणमा लिएको हो। यसबारे थप अनुसन्धान भइरहेको प्रहरीले जनाएको छ।