जग्गाधनीको मृत्युदर्ता देखाएर ७ करोडको जग्गा 'झ्वाम' पार्ने ५ जना पक्राउ

काठमाडौं– नेपाल प्रहरीको केन्द्रीय अनुसन्धान ब्यूरो (सीआईबी)ले नक्कली कागजात बनाएर सात करोड मूल्य पर्ने ११ आना २ पैसा जग्गा बिक्रीमा संलग्न ५ जनालाई पक्राउ गरेको छ।

जापानमा बसेका व्यक्तिको नक्कली मृत्युदर्ता प्रमाणपत्र बनाएर काठमाडौंको कीर्तिपुरमा रहेको ११ आना २ पैसा जग्गा बिक्री गर्नेहरूलाई सीआईबीले पक्राउ गरेको हो।

२०५५ सालदेखि जापानमा बस्दै आएकी शान्तिदेवी लोहनीको कीर्तिपुर नगरपालिका–२ मैत्रीनगरको ११ आना २ पैसा जग्गा उक्त गिरोहले नक्कली कागजपत्र बनाएर बिक्री गरेको भेटिएको सीआईबीका प्रवक्ता एसपी श्यामकुमार महतोले जानकारी दिए।

शान्तिदेवीको नक्कली मृत्युदर्ता प्रमाणपत्र बनाएर र नक्कली श्रीमान् खडा गरेर जग्गा बिक्री गरेको पाइएको महतोले बताए। नक्कली मृत्युदर्ता र नक्कली श्रीमान् बनाएर जग्गा बिक्री गरेको आरोपमा प्रहरीले महावीर चन्द, गणेशबहादुर खनाल, बाबुराम कार्की, प्रेमप्रसाद खनाल र ममता श्रेष्ठाई पक्राउ गरेको हो।

सीआईबीका अनुसार जग्गाधनी लोहनी नेपाल आएका बखत जेठ ५ गते मालपोत कार्यालयमा वायोमेट्रिक गर्न गएका बेला जग्गा बिक्रीको रहस्य खुलेको थियो । आफ्नो नाममा रहेको जग्गा बिक्री भएको देखिएपछि पीडित पक्षले प्रहरीलाई जानकारी दिएको थियो।

सीआईबीले घटनाबारे अनुसन्धान गर्दै जाँदा जग्गा बिक्रीमा संलग्नहरूलाई पक्राउन गर्न सफलता पाएको हो।