खुलामञ्चमा भूमिगत पार्किङको सम्भाव्यता खोज्ने काठमाडौं महानगरको नीति

काठमाडौं- काठमाडौं महानगरपालिकाले खुलामञ्चमा भूमिगत पार्किङको सम्भाव्यता खोजिने नीति लिएको छ। महानगरका प्रमुख बालेन्द्र शाहले आइतबार नगरसभामा आगामी आर्थिक वर्षको नीति तथा कार्यक्रम प्रस्तुत गर्दै यस्तो नीति लिइने उल्लेख गरेका हुन्। 

'काठमाडौं महानगरपालिका वडा नम्बर ११ खुलामञ्चसँगैको जग्गामा रिभर्स बोरिङसहितको भूमिगत पार्किङको सम्भाव्यता अध्ययन गरिनेछ,' प्रमुख बालेन्द्रले प्रस्तुत गरेको नीतिमा उल्लेख छ।

महानगरभित्र पार्किङ क्षेत्रको पहिचान गर्न अध्ययन टोली गठन गर्ने समेत नीति लिइएको छ। महानगरमा चल्ने सबै सवारी साधनलाई जिपीएस ट्र्याकिङ गर्ने र सार्वजनिक सवारीमा विद्युतीय माध्यमबाट भाडा तिर्न सकिने व्यवस्था गर्ने समेत नीति लिइने मेयर शाहको भनाइ छ। 

सबै सार्वजनिक यातायातलाई एउटै छातामुनि सञ्चालन गर्न पहल र फुटपाथमा पसल राख्न निषेध गर्ने नीति समेत लिइने मेयर शाहले उल्लेख गरे।