यातायात कार्यालयबाटै सवारी ट्रायल सेन्टर अनुगमन

काठमाडौं– अबदेखि यातायात व्यवस्था कार्यालयबाटै सवारी ट्रायल सेन्टरको अनुगमन गरिने भएको छ।

यातायात व्यवस्था कार्यालय सवारी चालक अनुमतिपत्र बागमती ललितपुरले एकान्तकुनामा हुने सवारी चालक अनुमतिपत्रको ट्रायल परीक्षा कार्यालयबाटै सिसीटिभीमार्फत अनुगमन गर्ने व्यवस्था गरेको हो।

कार्यालय प्रमुख अच्युतराज रेग्मीले सवारी चालक अनुमतिपत्रको ट्रायल परीक्षालाई थप मर्यादित र पारदर्शी बनाउन कार्यालयबाटै ट्रायल सेन्टर अनुगमनको व्यवस्था गरिएको जानकारी दिए।

‘यसअघि ट्रायल सेन्टरबाट मात्र अनुगमन गर्ने व्यवस्था थियो। अहिले कार्यालयबाटै अनुगमन गर्ने व्यवस्था गरेका छौं। यसले सेवा प्रवाहमा सहज भएको छ’, उनले भने।

कार्यालयले अहिले दैनिक १ हजार ५०० देखि २  हजारसम्म सेवाग्राहीलाई सेवा दिँदै आएको छ। सवारी अनुमतिपत्रको दर्ता, नवीकरण र राजस्व संकलन गर्दै आएको उक्त कार्यालयमा दैनिक भीडभाड हुँदै आएको छ।

सवारी अनुमतिपत्र वितरण गर्दा उक्त कार्यालयले नागरिकता, फोटो र प्रवेशपत्र भिडाएर दिने गरेको छ। सिसीटिभी जडान, नागरिकता, फोटो र प्रवेशपत्र भिडाएर सवारी अनुमतिपत्र वितरण गरेसँगै नतिजा तोडमोड गर्ने परम्पराको अन्त्य भएको कार्यालयले दाबी गरेको छ।

यस्तै, सवारीसाधन अनुमतिपत्रको ट्रायल परीक्षा दिनेबित्तिकै पास/फेल भएको नतिजालाई कार्यालयले तुरुन्तै वेबसाइटमा राख्दै आएको छ। सोही कारण आफू पास वा फेल भएको तत्कालै थाहा पाउन सकिन्छ। कार्यालय प्रमुख रेग्मीले भीडभाड हुने यातायात कार्यालयमा सेवाग्राहीको अनुपातमा कर्मचारी दरबन्दी कम भएको बताए।

उक्त कार्यालयमा हाल स्थायी ३४ र करारमा ११ कर्मचारी कार्यरत छन्। यस्तै, कार्यालय सहयोगी १८ जना छन्। स्थायीमध्ये पनि १० कर्मचारी कार्यालयमा नभएका कारण काममा समस्या हुने गरेको कार्यालय प्रमुख रेग्मीको भनाइ छ। विगतमा बिग्रेका अभिलेखका कारण काममा समस्या भएको कार्यालयले जनाएको छ।