पहिरोमा परी ताप्लेजुङमा दुई जनाको मृत्यु, सेनाको हेलिकोप्टरद्वारा घाइतेको उद्धार

ताप्लेजुङ- ताप्लेजुङको सिरिजंघा गाउँपालिका -७ खेवाङमा पहिरोमा परी दुई जनाको मृत्यु भएको छ। तुलसा अधिकारी र यसोधा अधिकारीको मृत्यु भएको प्रहरीले जानकारी दिएको छ। 

पहिरोमा परी भागेर ज्यान जोगाउन सफल भएका विष्णु घाइते छन्। उनलाई उपचारका लागि विराटनगर लगिएको छ। विष्णु तुलसाका छोरा हुन् भने यसोदाका श्रीमान् हुन्। 

घाइते विष्णुलाई नेपाली सेनाको हेलिकप्टरमार्फत विराटनगरको कोसी अस्पतालमा उपचारका लागि लगिएको प्रमुख जिल्ला अधिकारी महेशकुमार पोखरेलले जानकारी दिए। उनको पेट, अनुहार र टाउकोमा चोट लागेको छ। 

घटनास्थलबाट अन्य शवसमेत निकालिएको र हेलिकप्टरमै  राखेर शव परीक्षणका लागि सदरमुकाम फुङलिङमा पुर्‍याइएको थियो।घरमा तीन जना मात्रै बस्दै आएका थिए। परिवारका अन्य सदस्य भने झापास्थित घरमा बस्दै आएका छन्।

यता पहिरोकै कारण यहाँका दर्जनौँ घरपरिवार जोखिममा परेका छन्। रातभरको वर्षाका कारण कतिपयले छरछिमेकको घरमा रहेर रात कटाएका थिए। खेवाङसहित जिल्लाका विभिन्न ठाउँमा झरेको पहिरोले ठूलो क्षति पुर्‍याएको र क्षतिको विवरण सङ्कलन भइरहेको जिल्ला प्रहरी कार्यालयका प्रहरी नायब उपरीक्षक कैलाश राईले जानकारी दिए।