करको दरमा राष्ट्रघात प्रमाणित भए जिम्मेवारी लिन्छु : अर्थमन्त्री

काठमाडौं– अर्थमन्त्री जनार्दन शर्माले करको दरहरु कायम गर्दा कुनै राष्ट्रघात नगरिएको दावी गरेका छन्।

बिहीबार प्रतिनिधिसभाको बैठकमा बजेटबारे उठेका प्रश्नको जवाफ दिँदै अर्थमन्त्री शर्माले भने, ‘राजस्वसम्बन्धी समिति बनाएका करका दररेटहरुप्रति म पूर्ण जिम्मेजार छु, जवाफदेही छु। त्यसमा कतै राष्ट्रघात, गद्दारी भएको छ भने त्यसको म पूर्ण जिम्मेवारी लिन्छु। यहाँ कुनै राष्ट्रघात भएको छैन।’

डलरको सञ्चिति, आयात र उत्पादनलाई समेत ध्यानमा राखेर दरहरु परिवर्तन गरिएको उनको तर्क छ। अर्थमन्त्री शर्माले बजेटको अघिल्लो दिन आफू राति साढे ११ बजेदेखि पौने १२ बजेको बीचमा मन्त्री निवास पुल्चोक गएर आराम गरेको र बिहान ६ बजे मन्त्रालय आएको सुनाए।

बजेट आउने अघिल्लो रात अनधिकृत व्यक्ति छिरेर करका दरमा हेरफेर गरेको आरोपबारे अर्थमन्त्री शर्माले भने, ‘मन्त्रालयमा को आउँछ, जान्छ, मलाई थाहा हुने कुरा भएन। सचिव, डीजीसहित मिलेर बनाएको बजेटको जिम्मेवारी म लिन्छु। मन्त्रालयमा कुन मान्छे, भित्र आए भन्ने कुरा मलाई थाहा हुँदैन।’