एमालेबाट निर्वाचित जनप्रतिनिधिलाई ओलीले भने- नाम हाइहाइ हुने गरी काम गर्नुहोस्

काठमाडौं- नेकपा एमालेका अध्यक्ष केपी शर्मा ओलीले पछिल्ला दुई वर्षयता देशभक्ति आन्दोलन सिध्याउने षड्यन्त्र भइरहेको आरोप लगाएका छन्।

पार्टीबाट उम्मेदवार भई स्थानीय चुनाव जितेका प्रमुख तथा उपप्रमुख र अध्यक्ष तथा उपाध्यक्षहरुलाई प्रशिक्षण दिन आयोजित कार्यक्रमलाई सम्बोधन गर्दै ओलीले दुई वर्षयता अग्रगमन विरोधी, देश विरोधी, स्थायित्व विरोधीहरू सलबलाएको आरोप लगाए।

उनले यस्तो अवस्थामा पार्टीका निर्वाचित जनप्रतिनिधिलाई पाँच वर्ष सक्षम बन्ने गरी काम गर्न निर्देशन दिए। 'आफ्नो कार्यकाल पूरा गर्दा आफ्नो हाइहाइ हुने गरी काम गर्नुहोला। पाँच वर्षको कार्यकाल पूरा गर्दा तपाईंहरूको नाम हाइहाइ होस्,' उनले भने।

उनले आलोचना सुन्न नपरोस्, प्रशंसा होस् भन्दै राम्रा काम गर्न निर्देशन दिएका छन्। 'स्थानीय तहमा कसरी काम गर्नुपर्छ भनेर नमुना हुनुस्। जनताले प्राप्त गर्नुपर्ने सेवा सुविधा उपलब्ध गराउनुस्। जनताको सेवामा सधैँ तत्पर रहन सक्नुस्,' उनले भने।