मधेस प्रदेशले ल्यायो ४६ अर्ब ८८ करोडको बजेट

काठमाडौं– मधेस प्रदेश सरकारले आगामी आर्थिक वर्ष २०७९/८० का लागि कुल ४६ अर्ब ८८ करोेड ९ लाख ४६ हजार रुपैयाँ बराबरको अनुमानित आयव्ययसहितको बजेट सार्वजनिक गरेको छ। 

कुल बजेटमध्ये चालूतर्फ २१ अर्ब ७६ करोड ६७ लाख ९५ हजार, पुँजीगततर्फ २५ अर्ब ८२ करोड २० लाख ८० हजार र वित्तीय व्यवस्थापनतर्फ १६ करोड २४ लाख ५६ हजार २०० रुपैयाँ विनियोजन गरिएको प्रदेश सरकारले जनाएको छ। 

बजेट व्यवस्थापनको स्रोत सुनिश्चितातर्फ प्रदेशले आन्तरिक राजस्वबाट ४ अर्ब १८ करोड ९३ लाख ७५ हजार रुपैयाँ संकलन गरिने जनाएको छ। विभिन्न कोषबाट ३८ करोड, संघीय सरकारको राजस्व बाँडफाँट ११ करोड ६१ लाख ९८ हजार, समानीकरण अनुदानमार्फत ७ अर्ब ८१ करोड ५८ लाख, चालू आर्थिक वर्षको बजेटबाट बचत हुने ९ अर्ब ६६ करोड रुपैयाँ विनियोजन गरिएको
छ। 

विशेष अनुदानबाट ४९ करोड रुपैयाँ, समपूरक अनुदानबाट ७८ करोड, ससर्त अनुदानबाट १० करोड ०६ लाख ९१ हजार र युनिसेफबाट प्राप्त गरिने अनुदानबाट ४ करोड ३५ लाख ४७ हजार गरी कुल ४५ अर्ब ४ करोड ९३ लाख २८ हजार रुपैयाँ व्यवस्थापन गरिनेछ। अपुग हुने १ अर्ब ८२ करोड १० लाख १८ हजार २०० रुपैयाँ आन्तरिक ऋण परिचालन गरिने प्रदेश सरकारले बताएको छ।