राप्रपा भन्छ- स्वतन्त्र चुनावी सरकार गठन हुनुपर्छ

काठमाडौं- राष्ट्रिय प्रजातन्त्र पार्टी (राप्रपा)ले स्वतन्त्र चुनावी सरकार गठन हुनुपर्ने माग गरेको छ।

राप्रपाका अध्यक्ष तथा सांसद राजेन्द्र लिङदेनले बुधबारको प्रतिनिधि सभा बैठकमा बोल्दै स्वतन्त्र चुनावी सरकार गठनको माग गरेका हुन्।

विशेष समय लिई बोलेका लिङदेनले निर्वाचनलाई स्वतन्त्र, निष्पक्ष र धाँधलीरहित बनाउन स्वतन्त्र सरकार गठबनको गरिनुपर्ने बताएका छन्।

यसका साथै उनले एमसीसी हतारमा पारित गरिएको र त्यसँसगै अरू कुरा ताँती लागेर आउने दाबी गरे।

'बहुमतको बलमा हतार गरेर एमसीसी पास गरियो। त्यसका पछि धेरै कुरा ताँती लागेर आउँदै रहेछन्। फेरि सरकारले सोही प्रकारको गल्ती किन दोहोर्‍याइरहेको छ?,' उनको प्रश्न छ।

उनले सरकारले केटाकेटी व्यवहार गर्ने गरेको आरोप समेत लगाएका छन्। उनले सरकारको केटाकेटी व्यवहारले असंलग्न परराष्ट्र नीतिमा नेपालको असन्तुलन पैदा हुने चिन्त व्यक्त गरेका छन्।