३१ लाख खर्चेर बनाएको शौचालयमा मानिसको डेरा !

जनकपुरधाम- उपमहानगरपालिका हुँदै प्रदेश-२ को अस्थायी राजधानी बनेको छ, जनकपुर । राजधानी भएलगत्तै यहाँ मानिसको चाप पनि उकालो लागेको छ । तर, पर्याप्त सार्वजनिक शौचालय नहुँदा सडक किनारमै दिसा-पिसाब फेर्न बाध्य छन्, सर्वसाधारण ।

जबकि, सरकारी निकायको बेवास्ताका कारण लाखौं खर्चेर निर्माण गरिएको शौचालय प्रयोगविहीन छ । र, बासस्थानको रूपमा परिणत भएको छ । सरसफाइको काम गर्ने एउटा परिवारले शौचालयलाई बासस्थल बनाएको छ । 

जनकपुर-४ स्वर्गद्वारीनजिक करिब चार वर्षअघि सार्वजनिक शौचालय निर्माण गरिएको थियो । 

बृहत्तर जनकपुर क्षेत्र विकास परिषदले डम्पिङ साइटको रूपमा प्रयोग हुँदै आएको सार्वजनिक जग्गालाई व्यवस्थापन गर्ने उद्देश्यले ३१ लाख खर्चेर सुविधासम्पन्न शौचालय निर्माण गरेको थियो । तर, चार वर्ष बित्दा पनि यसलाई प्रयोगमा ल्याइएको छैन ।

शौचालय निर्माणको ठेक्का पाएका विवेकानन्द मिश्र आफूले तोकिएकै समयमा निर्माण पूरा गरे पनि सरोकारवाला निकायले जिम्मा नलिएको बताउँछन् । सरोकारवाला निकायले ध्यान नदिँदा सुविधासम्पन्न सार्वजनिक शौचालय प्रयोगमा आउन नसकेको धनुषा निर्माण व्यवसायी संघका अध्यक्षसमेत रहेका मिश्र बताउँछन् । 

निर्माण सकेर अन्तिम बिलसमेत परिषदको कार्यालयमा बुझाइसकेको उनी बताउँछन् । उनी भन्छन्, ‘कहिले प्राविधिकको बहाना त कहिले पैसा नभएको बहानामा मलाई अल्झाइएको छ ।’

सम्झौताअनुसारको रकम कार्यालयले फस्र्योट नगरेका कारण आफूले निर्माण गरेको संरचना हस्तान्तरण गर्न नपाएको उनको भनाइ छ । कार्यालयले दायित्व नलिएकै कारण त्यो प्रयोगमा आउन नसकेको उनी बताउँछन् । 

परिषद्का कर्मचारीहरूको गैरजिम्मेवारपूर्ण रवैयाका कारण लाखौं रुपैयाँ बालुवामा पानी खन्याएजस्तो हुन पुगेको मिश्र बताउँछन् । परिषदले चासो नदिँदा आफूले गरेको खर्च पनि नपाएको उनको भनाइ छ ।