पारित भयो गण्डकीको नीति तथा कार्यक्रम

पोखरा- आगामी आर्थिक वर्षका लागि गण्डकी प्रदेश सरकारको नीति तथा कार्यक्रम सोमबार पारित भएको छ। मुख्यमन्त्री कृष्णचन्द्र नेपाली पोखरेलले निर्णयार्थ प्रस्तुत गरेको नीति तथा कार्यक्रम प्रदेश सभाबाट बहुमतले पारित भएको हो।

प्रदेश प्रमुख पृथ्वीमान गुरुङले जेठ २४ गते प्रदेश  सभामा सरकारको नीति तथा कार्यक्रम प्रस्तुत गरेका थिए। २६ गतेबाट नीति तथा कार्यक्रममा माथि छलफल सुरु भएको थियो। छलफलका क्रममा उठेका प्रश्नमाथि सोमबार मुख्यमन्त्री कृष्णचन्द्र नेपाली पोखरेलले जवाफ दिएलगत्तै नीति तथा कार्यक्रम निर्णयार्थ प्रस्तुत भएको थियो।

गण्डकी प्रदेश सभामा अहिले सभामुखबाहेक सत्तापक्षमा ३१ सदस्य छन्। कांग्रेसका १५, माओवादी केन्द्रका १२ (सभामुख सहित), जनमोर्चाका २, जनता समाजवादीका २ र स्वतन्त्र १ सदस्य सत्ता पक्षमा छन्। प्रतिपक्षमा एमालेका २६ सांसद छन्। ६० सदस्यीय प्रदेश सभामा अहिले ५८ सदस्य कायम छन्। जनमोर्चाका कृष्ण थापालाई गत वर्ष नै पार्टीले कारबाही गरेको थियो। एमालेका कृष्ण थापा पोखरा महानगरको मेयरमा चुनाव लड्न राजीनामा दिएका थिए।