काठमाडौं- काठमाडौंसहित बागमती, गण्डकी र प्रदेश-१ का केही ठाउँमा रातिदेखि पानी परेको छ। यी प्रदेशका धेरै ठाउँमा दिउँसो पनि पानी पर्ने मौसम पूर्वानुमान महाशाखाले जनाएको छ।
केही दिनदेखि लगातारजसो पानी परेको मधेस प्रदेशमा भने आज खासै पानी पर्ने सम्भावना नरहेको मौसमविद्ले बताएका छन्।
बागमती, गण्डकी र प्रदेश-१ मा भने आज हल्कादेखि मध्यम खालको वर्षा हुने अनुमान गरिएको महाशाखाले जनाएको छ। अहिलेसम्म चार प्रदेश बागमती, गण्डकी, मधेस प्रदेश र प्रदेश-१ मा मनसुनी गतिविधि सक्रिय छ।
लुम्बिनी प्रदेशको भने आंशिक क्षेत्रमा मात्रै मनसुन प्रवेश गरेको छ। अब मनसुन कर्णाली प्रदेशतर्फ सर्दै गरेको पनि मौसमविद् भट्टराईले जानकारी दिए।
पानी पर्ने सम्भावना रहेकाले यात्रा गर्दा वा घाँस दाउरा गर्दा सतर्कता अपनाउन महाशाखाको आग्रह छ।