जनकपुरधाम- एकीकृत बाल क्लब जनकपुरधामले बालश्रम अन्त्य गर्न माग गरेको छ। विश्व बाल श्रमविरुद्धको दिवस मनाउँदै उसले उपमहानगरपालिकामा बालश्रम बढेको भन्दै रोक लगाउन माग गरेको हो।
'बाल श्रम अन्त्य गरौँ, बाल अधिकारको सुनिश्चितता गरौँ, यो कलिलो हात : मजदुरी गर्न होईन सरकार, कलमको डोभले भविष्य बनाउन हो' जस्ता नाराहरूको साथमा जनकपुरधामको जनकचौकमा क्लबले प्रदर्शन गरेको थियो।
कार्यक्रममा वक्ता रहेका चन्दन कौशिकले बालबालिका आफ्नो र आफू जस्ताको अधिकारबारे सचेत देखेको मा खुसी व्यक्त गरेका थिए। 'सरोकारवाला निकायलाई थप जागरुक बनाउन भाइबहिनीको उत्साहलाई सकारात्मक बनाउन पर्छ,' उनले भने।
कार्यक्रममा कायापलटका संयोजक दिवाकर उप्रेतीले सरकार थप संवेदनशील बन्न पर्ने बताए। इन्सेक प्रतिनिधि बरुण बस्यालले सरकार संवेदनशील बन्दै, बाल रोजगारीको सट्टा वयस्क राख्नुपर्ने बताए।
कार्यक्रममा ओरेक नेपालका जिल्ला संयोजक रोजलिन सिंह बच्छार, अधिकारकर्मी जमुना भुजेल, सेभ द चिल्ड्रेनका प्रतिनिधि अभिलेष कर्ण, कायापलटका संयोजक दिवाकर उप्रेती, युवा अभियान्ता कैयुम राईन, महिला अधिकारकर्मी सुभद्रा आले, युवा अभियन्ता रिषभ शाही, सुभम झा, इन्सेक प्रतिनिधि बरुण बस्याल, एकीकृत बाल क्लबकी अध्यक्ष श्रुति तिवारी, बाल क्लबकी सचिव हिमानी मिश्रालगायतको उपस्थिति रहेको थियो।