मधेशको मुद्दामा मिडियाको भूमिका

काठमाडौं- मधेसका मुद्दामा मिडियाले रिसर्च गरेर समाग्री प्रकाशन प्रसारण गर्नु पर्नेमा एक कार्यक्रमका वक्ताहरुले जोड दिएका छन्। ‘परिवर्तनको अभियान नेपाल’को आयोजना गरेको ‘मधेस मुद्धा’मा मिडियाको भूमिका विषयक संवाद कार्यक्रममा वक्ताहरुले मधेसकासमस्या समाधानका लागि मुलधारका मिडियाहरुले विशेष भूमिका खेल्नु पर्ने उनीहरुले जोड दिए।

पत्रकार वसन्त बस्नेत, मिडिया अनुसन्धानकर्ता प्रियंका झाले दिएको प्रस्तुतिमा मधेस विश्लेषक तुलानारायण साहले टिप्पणी गरेका थिए। मधेसका एजेन्डाहरुको सवालमा मधेसी समुदायको भावना अनुरुप यथेष्ट स्थान संचारमाध्यमहरुले नदिएको चर्चा गरिएको थियो। विश्लेषक साहले मधेस र पहाडी समुदायबीचको ऐतिहासिक सम्बन्ध र हालको अवस्थाबारे चर्चा गरेका थिए। सबैले सबैको भाषा, संस्कृती र भावनालाई सम्मान गर्दा मधेसी र पहाडी समुदायबीचको सामाजिक सद्भाव बलियो बन्ने उनले उल्लेख गरे।

मिडिया अनुसन्धानकर्ता झाले मिडियाले मधेसी र पहाडी समुदायबीच विश्वास मजबुत पार्ने खालका समाग्री प्रकाशन प्रशारण गर्नुपर्नेमा जोड दिए।

परिवर्तनको अभियान नेपालले मधेस प्रदेश र प्रदेश नम्बर-१ का विभिन्न जिल्लाहरुमा पहाडी–मधेसी समुदायबीच सद्भाव र विश्वास निर्माण गर्न समाजिक अभियान चलाउँदै आएको संस्थापक अध्यक्ष केशब दाहालले बताए।