लैनचौरबाट ३५ लाख लुटपाट घटनामा संलग्न थप एक व्यक्ति पक्राउ

काडमाडौं- काठमाडौंको लैनचौरमा ३५ लाख लुटपाट गरेको घटनामा संलग्न थप एक जनालाई प्रहरीले दाङबाट पक्राउ गरेको छ। दाङको घोराही उपमहागनरपालिका-१० का २५ वर्षीय सुदन नेपालीलाई पक्राउ गरिएको प्रहरीले जनाएको छ।

जिल्ला प्रहरी प्रमुख प्रहरी उपरीक्षक सुरेश काफ्लेका अनुसार नेपालीलाई शुक्रबार दाङ भालुवाङस्थित आफ्नो ससुरालीमा लुकेर बसेको अवस्थामा पक्राउ परेका हुन्।

नेपालीसहित केही युवाहरूले काठमाडौंको लैनचौरमा जेठ ८ गते अपराह्नमा ३५ लाख लुटपाट गरी फरार भएका थिए। उनीहरूले एक जना व्यापारीलाई सस्तोमा सुन दिनेभन्दै प्रलोभनमा पारेर लुटपाट गरेका थिए।

३५ लाखमा धेरै सुन पाउने भएपछि पीडित व्यापारी लैनचौर पुगेका थिए। तर, उनी लुटिएपछि प्रहरी वृत्त लैनचौर पुगेका थिए। 

त्यसपछि प्रहरीले घटनासम्बन्धी अनुसन्धान अघि बढाएको थियो। घटनास्थलमा पैसा खोसाखोस हुँदा एउटा मोबाइल पनि खसेको थियो। मोबाइलबाट यस घटनामा प्रहरीको पनि संलग्नता भएको खुलेको थियो।

जिल्ला प्रहरी परिसर काठमाडौंका अनुसार यस घटनामा एक जना सिपाही र एक जना हवल्दारको संलग्नता रहेको खुलेको हो। प्रहरीले यस घटनामा संलग्न दुई जनालाई यसअघि नै पक्राउ गरिसकेको छ। 

यसअघि पक्राउ पर्नेमा नुवाकोटको दुप्चेश्वर गाउँपालिका-१ घर भई बुढानिलकण्ठ नगरपालिका-६ बस्ने २५ वर्षीय पेम्बा तामाङ र दाङ घर भई काठमाडौं मालीगाउँ बस्ने ३४ वर्षीय सालिक राम नेपाली छन्।