नागरिकता बनाउन नक्कली कागजात पेश गर्ने आमा छोरा पक्राउ

रुपन्देही- नागरिकता बनाउन नक्कली नागरिकता पेश गर्ने दुई जनालाई रुपन्देही प्रहरीले पक्राउ गरेको छ।

जिल्ला प्रशासन कार्यालयमा छोराको नागरिकता बनाउन आफ्नो श्रीमानले बनाएको नक्कली नागरिकता पेश गरी नागरिकता बनाउन खोजेको आरोपमा आमाछोरालाई प्रहरीले पक्राउ गरेको हो।

शुद्धोधन गाउँपालिका–५ की अबराईन खातुनले आफ्ना श्रीमान रियाजुद्दीन खान मुसलमानले बनाएको नक्कली नागरिकतासहित जिल्ला प्रशासन कार्यालयमा नागरिकताका लागि बिहीबार कागजातहरु पेश गरेकी थिइन्।

छानबिन र अनुसन्धान गर्दा रियाजुद्दीनको नागरिकता नै नक्कली भेटिएपछि अबरईन र जाबेदलाई नियन्त्रणमा लिई प्रहरीको जिम्मा लगाइएको सहायक प्रमुख जिल्ला अधिकारी अनिल पौडेलले बताए।

सहायक प्रजिअ पौडेलले रियाजुद्दीनको नागरिकताको विवरण रुपन्देही प्रशासन कार्यालयसँग माग गर्दा सो नामको कुनै नागरिकता नभेटिएको र हेर्दा नै नक्कली नागरिकताजस्तो देखिएको, रुपन्देहीमा कुनै विवरण समेत नरहेको र लोगो समेत नक्कली भेटिएको बताए।

२०६१ सालमा अबराईनले विवाह गरेको प्रमाणपत्र पेश गरेकोमा उनले २०६३ सालमा आफू अविवाहित भनेर नागरिकताको प्रमाण लिएको भेटिएको पौडेलले बताए।

झुठो विवरण दिई किर्ते नागकिरता बनाउन खोजेको दुबैमाथि नागरिकता ऐन र नियमाली अनुसार कारबाही प्रक्रिया अगाडि बढाइएको जिल्ला प्रहरी कार्यालय कपिलवस्तुका प्रहरी उपरीक्षक दानबहादुर कार्कीले बताए।