बलात्कार प्रयास विफल भएपछि हत्या, आरोपित पक्राउ

दार्चुला- दार्चुलामा बलात्कार प्रयास विफल भएपछि एक महिलाको हत्या भएको छ। जिल्लाको शैल्यशिखर नगरपालिका-१ बारिल बस्ने ४५ वर्षीया अनिभा खडायतमाथि बलात्कार प्रयास असफल भएपछि हत्या भएको प्रहरीले बताएको छ। हत्या आरोपमा सोही स्थानका ४२ वर्षीय भोजराज खडायत पक्राउ परेका छन्। 

भोजराजले ती महिलालाई घरबाट बोलाई बारीमा लगेको र करणी गर्ने विषयमा उनीहरूबीच विवाद हुँदा ढुङ्गा हानी घरतर्फ जाँदै गर्दा मृतकको छोरीले देखेकी थिइन्। यसपछि आफ्नो पोल खुल्ने डरले पुन: घटनास्थल गई खरले छोपी आगो लगाई भागेको अनुसन्धानको क्रममा खुल्न आएको प्रहरीले बताएको छ। हत्या आरोपित खडायतको साथबाट प्रहरीले अनिभाका सुनको बाली २ थान र नथियाँ १ थान समेत बरामद गरेको छ। 

आफ्नै घरबाट ५० मिटर टाढा उखुबारीमा खरको थुप्रोमा जलेको अवस्थामा गत बुधबार अनिभाको शव फेला परेको थियो। घटनाको अनुसन्धान गर्न जिल्ला प्रहरी कार्यालय दार्चुला र जिल्ला प्रहरी कार्यालय बैतडीको समन्वय र सहकार्य ईलाका प्रहरी कार्यालय गोकुलेश्वर दार्चुला र प्रहरी चौकी खोचलेक बैतडीबाट खटिएको प्रहरीले घटनामा संलग्न उनलाई बैतडी दोगडाकेदार गाउँपालिका-३ खोचलेकबाट पक्राउ गरेको हो। 

उनी उपर जबरजस्ती करणी, ज्यानसम्बन्धी कसूर र डाँका चोरी शीर्षक मुद्दामा जिल्ला अदालत दार्चुलाबाट ७ दिन म्याद थप अनुमति लिई थप अनुसन्धान भइरहेको प्रहरीले जानकारी दिएको छ।