मुग्लिन-आँबुखैरेनी सडकखण्डमा केही दिन ठूला सवारी नचल्‍ने

काठमाडौं- पृथ्वीराजमार्गअन्तर्गत मुग्लिन-आँबुखैरेनी सडकखण्डमा एकतर्फी रुपमा साना सवारीमात्रै चल्‍ने भएका छन्।  सडक विभागले भित्तातर्फको पहिरो करिब २ फिट काटेर शुक्रबार बिहान ११ बजेदेखि साना सवारीसाधन सञ्चालन गरेको हो। 

तर, केही दिन ठूला सवारीसाधन भने नचल्‍ने भएका छन्। तनहुँका सहायक प्रमुख जिल्ला अधिकारी काशिराम गैरेले सडकखण्ड करिब २० मिटर भाँसिएकोले सडक बनाउन केही समय लाग्‍ने भएको हुँदा ठूला सवारीसाधन नचल्‍ने बताएका छन्। 

उनले भने, ‘करिब २० मिटर सडक भासिएको छ। वरपरका ४० मिटर क्षेत्र जोखिममा छ। त्यसकारण केही दिन ठूला सवारीसाधन उक्त सडकखण्डमा चलाउने नमिल्‍ने बनाएका छौं।'

सडक भासिएपछि २ फिट परसम्म पहिरो काटेर साना सवारी चल्ने व्यवस्था मिलाए र ठूला सवारी चलाउने अवस्था नभएको उनले बताए। पहिरो काटेर बाटो निर्माण गर्न लागेका पनि उनले जानकारी दिए। 

आँबुखैरेनी गाउँपालिका-४ ड्यामसाइडमा शुक्रबार बिहान करिब ४ बजेतिर सडक भासिएको थियो।