आँबुखैरेनी पहिरो : मृत्यु भएका दुईमध्ये एक जनाको सनाखत

काठमाडौं- पृथ्वीराजमार्गअन्तरगत मुग्लिन-आँबुखैरेनी सडक भासिँदा दुर्घटनामा परी ज्यान गुमाएका दुई जनामध्ये एक जनाको सनाखत भएको छ। मृतकमध्ये एक जना गोरखाको सिरानचोक गाउँपालिकास्थित छोप्राकका केशव घिमिरे रहेको प्रहरीले जनाएको छ। 

सडक भासिएपछि मर्स्याङ्दी नदी किनारमा दुई पुरुषको शव फेला परेको थियो। कार मानिससहित पहिरोमा खसेको प्रहरीले जनाएको छ।

जिल्ला प्रहरी कार्यालय तनहुँका अनुसार बा१०च ४६४९ नम्बरको कार र बा३३प १०८१ नम्बरको मोटरसाइकल पहिरोसँगै नदीमा खसेको थियो।

कारमा कति जना सवार थिए भन्ने खुल्न नसकेको प्रहरीको भनाइ छ। मोटरसाइकलमा सवार व्यक्ति भने हाम फालेर ज्यान जोगाउन सफल भएका छन्।

पोखरा र चितवनबाट आएको गोताखोर टोलीले उक्त नदीमा खोजीकार्य गरिरहेको छ। उक्त सडक भासिँदा दुईतर्फी सवारी आवागमनमा अवरुद्ध भएको छ। पहिरोका कारण सवारी साधनको जाम भएपछि यात्रु अलपत्र परेका छन्।