सरकारी वकिल कार्यालयमा थुनुवाको मृत्यु

विराटनगर- जिल्ला सरकारी वकिल कार्यालय मोरङको सोधपुछ कक्षमा एक थुनुवाको मृत्यु भएको छ। 

ज्यान मार्ने उद्योग मुद्दामा प्रतिवादी बनाइएका मोरङको केराबारी गाउँपालिका-२ का ४८ वर्षीय भक्तबहादुर ठकुरीको मृत्यु भएको हो। 

जेठ २५ गते ठकुरीलाई घरबाटै प्रहरीले पक्राउ गरेर अदालतमा उपस्थित गराउन बिहीबार सरकारी वकिल कार्यालयमा पेस गरेको थियो। 

अनुसन्धान यसअघि नै सकिएको ज्यान मार्ने उद्योग मुद्दाका प्रतिवादी ठकुरीलाई अदालत उपस्थित गराउन पुनः प्रहरीले पक्राउ गरेको थियो। सरकारी वकिल कार्यालयको सोधपुछ कक्षमा राखिएका बेला अचानक फिँज काड्दै बेहोस भएपछि उनलाई उपचारका लागि कोसी अस्पताल लगिएको थियो। 

अस्पताल भर्ना गरिएको एक घण्टापछि उनको मृत्यु भएको मोरङ प्रहरीका प्रवक्ता डिएसपी दिपक श्रेष्ठले जानकारी दिए। 

आफ्नै पत्नी सकुन्तला ठकुरीलाई गत वर्षको माघमा आक्रमण गरेर गम्भीर घाइते बनाएको अभियोगमा प्रहरीले उनीविरुद्ध मुद्दा चलाएको हो।  प्रहरीले पक्राउ गरेर अनुसन्धानअघि बढाउने क्रममा कोरोना भाइरसको संक्रमण पुष्टि भएसँगै पछि उपस्थित गराउने शर्तमा उनलाई माघ ४ गते हाजिरजमानीमा छाडिएको मोरङ प्रहरीले जनाएको छ।