बञ्चरेमा अझै आन्दोलन, संघर्ष समिति संयोजक ढुंगाना रिहा

काठमाडौं- काठमाडौंको फालिने स्थान बञ्चरेडाँडाका स्थानीय अझै पनि आन्दोलनमा नै रहेका छन्। उपत्यकाको फोहोर लिएका गएका ट्रक फर्किएपछि आन्दोलन मत्थर हुने अपेक्षा गरिएपनि त्यसविपरीत स्थानीयले आन्दोलन जारी राखेका हुन्। 

बुधबार प्रहरीले धरपकड र अश्रुग्याससहितको बल प्रयोग गरी काठमाडौंको फोहोर विसर्जन गर्ने प्रयास गरेको थियो। तर स्थानीयको आन्दोलन दबाउन नसकेपछि फोहोरका डेढ सय ट्रक काठमाडौं नै फर्काइएको थियो। 

धुनिवेशी नगरपालिका वडा १ का अध्यक्ष मानबहादुर तामाङका अनुसार स्थानीयको मागका विषयमा थप छलफल भएको छैन। काठमाडौं महानगरमा पुनःबैठक बस्ने तयारी भइरहेको जानकारी आएको उनले बताए। 

बुधबारदेखि ककनी प्रहरीको नियन्त्रणमा रहेका संघर्ष समितिमा संयोजक श्रीराम ढुङ्गानासहित तीन जनालाई भने प्रहरीले बिहीबार दिउँसो रिहा गरेको छ। 

'हामीलाई प्रधानमन्त्रीले छलफलमा बोलाउने प्रहरीले सुनाएको छ। तर यसबारे आधिकारिक रूपमा जानकारी आएको छैन,’ संयोजक ढुङ्गानाले नेपाल समयसँग भने।