काठमाडौं- अमेरिकामा बुधबारबाट सुरु भएको आईसीसी क्रिकेट विश्वकप लिग २ अन्तर्गतको नेपाल, अमेरिका र ओमन सम्मिलित त्रिकोणात्मक सिरिजमा आज नेपालले पहिलो खेल खेल्दैछ। अमेरिकामा आयोजना भएको सिरिजमा नेपालले पहिलो खेलमा ओमनको सामना गर्न लागेको हो।
बिहीबार राति सुरु हुने खेलमा नेपालले लिग २ तालिकाको शीर्षस्थानमा रहेको ओमनको सामना गर्न लागेको हो।
आफ्नो अन्तिम सिरिज रहेको ओमन सबै खेलमा जित निकाल्ने लक्ष्यका साथ मैदानमा उत्रिए पनि उसले पहिलो खेलमा भने हार बेहोरिसकेको छ।
ओमनले अहिलेम्म ३३ खेलबाट ४० अंक जोडिसकेको छ। सिरिजमा पहिलो खेलमा हार बेहोरे पनि नेपालविरुद्ध जितको लक्ष्यका साथ ओमन मैदानमा उत्रँदै छ। यता नेपाललाई पनि यो सिरिजमा जितको आवश्यक्ता रहेको छ।
किनभने नेपाल अहिलेसम्म १२ खेलबाट १२ अंकका साथ तालिकाको पुछारबाट दोस्रो स्थानमा छ। अमेरिका तालिकामा चौथौ स्थानमा छ। स्थानका हिसाबले हेर्ने हो भने जारी सिरिजमा नेपाल सबैभन्दा कमजोर टिम हो।
तर नेपालले १२ खेल खेलेको छ भने अमेरिकाले २१ खेलमा सहभागीता जनाइसकेको छ। अमेरिकाको २१ अंक छ।
लिग २ को जारी सिरिजका सबै खेलमा नेपाले जित निकाल्न सके नेपाल चौथो स्थानमा पुग्न सक्नेछ। अहिले चौथो स्थानमा युनाइटेड अरब इमिरेट्स रहेको छ।