देशका केही नदीमा अचानक बाढीको सम्भावना, सतर्क रहन आग्रह

काठमाडौं- देशका विभिन्न भागमा आज पनि वर्षा हुने भएको छ। नेपालमा मनसुनी याम सुरु भएसँगै वर्षा भइरहेको हो।

वर्षा भएसँगै बाढीपहिरोको जोखिम बढेको छ। बाढी पूर्वानुमान महाशाखाले आज इलाम, झापा, मोरङ, सुनसरी, उदयपुर, ओखलढुङ्गा, काभ्रे, तनहुँ र स्याङजा क्षेत्रका केही साना खोला तथा नदीमा अचानक बाढी आउनसक्ने पूर्वानुमान गरेको छ।  

तर, मुलुकका प्रमुख नदीमा बहाव सतर्कता तहभन्दा तलै रहने महाशाखाको पूर्वानुमान छ।  बर्खा याम सुरु भएसँगै महाशाखाले बाढी बुलेटिन जारी गर्न थालेको हो। अचानक बाढीको सम्भावना रहेकाले तटिए क्षेत्रका बासिन्दालाई उच्च सतर्कता अपनाउन महाशाखाले आग्रह गरेको छ।

हाल काठमाडौं उपत्यका सहित देशका केही भागमा वर्षा भइरहेको छ। प्रदेश-१, मधेस प्रदेश, बागमती प्रदेश, गण्डकी प्रदेशका केही  स्थानमा वर्षा हुनेछ। जल तथा मौसम विज्ञान विभागका अनुसार कर्णाली र लुम्बिनी प्रदेशका एकदुई स्थानमा हल्कादेखि मध्यम वर्षाको सम्भावना रहेको छ।

प्रदेश-१, मधेस प्रदेश, बागमती प्रदेश, गण्डकी प्रदेश र कर्णाली प्रदेशमा सामान्यदेखि पूर्ण बदली रही बाँकी भूभागमा आंशिकदेखि सामान्य बदली रहनेछ। 

विभागका अनुसार आज राति प्रदेश-१, मधेस प्रदेश, बागमती प्रदेश र गण्डकी प्रदेशमा आंशिकदेखि सामान्य बदली रहनेछ। बाँकी भूभागमा आंशिक बदलीदेखि मौसम सामान्यतया सफा रहनेछ। 

प्रदेश-१, मधेस प्रदेश, बागमती प्रदेश र गण्डकी प्रदेशका केही स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको विभागले जनाएको छ।