बञ्चरे डाँडामा आज पनि स्थानीयको अवरोध कायमै

काठमाडौं- बञ्चरे डाँडामा आज पनि स्थानीयको अवरोधका बीच फोहोर विसर्जनको गरिँदै छ। 

वातावरण महाशाखाकी प्रमुखले फोहोर विसर्जनमा तत्काल अरू ठाउँ विकल्प नभएको भन्दै सुरक्षा बलको सहयोगमा फोहोर विसर्जनलाई निरन्तरता दिने बताएकी छन्। 

मंगलबार स्थानीयको अवरोधमा सुरक्षाबलको प्रयोगबाट झण्डै १ सय ९७ ट्रिपबाट फोहोर विसर्जन गरिएको थियो। आज त्यही परिमाणको हाराहारी फोहोर विसर्जन हुने प्रमुख सरिता राईले बताइन्। 

झण्डै एक साता बढीको अवरोधका कारण काठमाडौंमा संकलन गरिएका ४ हजार मेट्रिक टन फोहोर विसर्जन भइरहेको हो। फोहोर विसर्जनसँगै काठमाडौंका फोहोर संकलनको कामले निरन्तरता पाउने विभागको भनाई छ। 

अवरोध गर्न गठित संघर्ष समितिका संयोजक श्रीराम ढुंगानासहित १७ जनालाई प्रहरीले मंगलबार बिहान १० बजेदेखि साँझ ७ बजेसम्म प्रहरीको भ्यानमा राखिएको थियो। स्थानीयहरूले माग पुरा नभएसम्म अवरोध कायम राख्ने बताउँदै आएका छन्।