लुम्बिनीको नीति तथा कार्यक्रम आज

बुटवल- लुम्बिनी प्रदेश सरकारले प्रदेशसभामा बुधबार दिउँसो नीति तथा कार्यक्रम ल्याउने भएको छ। आर्थिक बर्ष ०७९/८० का लागि दिउँसो १ बजे बस्ने प्रदेशसभामा प्रदेश प्रमुख अमिक शेरचनले नीति तथा कार्यक्रम प्रस्तुत गर्नेछन्।

यसअघि २३ गतेका लागि तय भएपनि प्रदेश प्रमुख शेरचन बिरामी भएकाले २ दिन पछाडि प्रदेशसभा बैठक सारिएको थियो। बुधबार नीति तथा कार्यक्रम पेश गर्ने कार्यसूची रहेको लुम्बिनी प्रदेशसभाका सचिव दुर्लभ कुमार पुन मगरले जानकारी दिए। नीति तथा कार्यक्रम प्रस्तुत भएपछि त्यसमाथी छलफल सुरु हुनेछ। 

प्रदेश सरकारले असार १ गते बजेट ल्याउने छ। लुम्बिनीमा यो वर्ष बजेटको आकार घटाउने भएको छ। चालु आर्थिक वर्षमा बजेट खर्च गर्न नसकेको तथा आन्तरीक आम्दानी नभएकाले घाटाको बजेट ल्याउने पक्षमा सरकार नरहेको अर्थमन्त्रालयले जनाएको छ। 

लुम्बिनी प्रदेशमा ३७ अर्ब हाराहारीको बजेट आउनेछ। ३५ अर्ब रकम प्रदेशमै भएको र त्यसलाई केही बढाएर लुम्बिनी प्रदेशको आर्थिक वर्ष २०७९/०८० को लागि बजेट ३७ अर्बसम्मको बनाउने तयरी भएको लुम्बिनी प्रदेशका उपाध्यक्ष वामदेव क्षेत्रीले बताए।