देशभर लगातार तीन दिन वर्षा हुने : सतर्क रहन अपिल

काठमाडौं- सोमबारबाट देशभर लगातार तीन दिनसम्म वर्षा हुने भएको छ । जल तथा मौसम विज्ञान विभागका अनुसार सामान्यदेखि पूर्ण बदली रहि तीन दिन लगातार वर्षा हुने भएको हो । 

पूर्वका केही स्थानमा भारी वर्षा हुने सम्भावना रहेको विभागले जनाएको छ । त्यस्तै मध्य नेपालका थोरै र पश्चिमका केही स्थानमा पनि भारी वर्षा हुने अनुमान छ । मंगलबार दिउँसो र राती देशभर सामान्य तथा पूर्ण बदली रहि केही स्थानमा हल्का र मध्यम बर्षा हुने उल्लेख छ । बुधबार पनि वर्षा हुने विभागले जनाएको छ । 

विभागले एक सूचना जारी गर्दै दिउँसो पूर्व र मध्यका केही स्थानहरुमा र पश्चिमका एक दुई स्थानमा भारी वर्षा हुने जनाएको छ । यस्तै राति पश्चिमका केही स्थानमा र मध्य तथा पूर्वका एक दुई स्थानमा भारी वर्षा हुने संभावना देखिएको सुचनामा उल्लेख छ । भारी वर्षाको सम्भावना रहेकाले सतर्क रहन पनि विभागले आग्रह गरेको छ।

विभागले पहाडी क्षेत्रमा पहिरोको जोखिम रहेको भन्दै अत्यावश्यक अवस्थामा बाहेक यात्रा नगर्न आग्रह गरेको छ । बाढीको जोखिम रहेका क्षेत्रहरुमा सतर्कता अपनाउन पनि विभागले अपिल गरेको छ । 

कन्काइ, कमला, बागमती, पूर्व राप्ती, तीनाउ, पश्चिम राप्ती, बबई, मोहना लगायतका नदीमा पानीको बहाव बढ्दो क्रममा रहेकाले ती नदीहरुले सर्तकर्ता तह पार गर्न सक्ने विभागले बताएको छ । विभागका अनुसार प्रदेश १ र २ को लालबकैया, रातु, खाँडो, गागन, सुनसरी, बुढी, बिरिङ, मेची लगायतका नदीमा उच्च जोखिम रहेको छ । प्रदेश ३ र ४ (गण्डकी), प्रदेश ५ र ६ को तराई क्षेत्रमा मध्यम बाढीको जोखिम छ ।