५११ खेलाडी सम्मिलित एसियन गेम्सको बन्द प्रशिक्षण बुधबारबाट

काठमाडौं– चीनमा हुने १९ औं एसियन गेम्सका लागि नेपाली खेलाडीको प्रारम्भिक बन्द प्रशिक्षण भोलि (जेठ २५ गते) बाट सुरु हुने भएको छ। राष्ट्रिय खेलकुद परिषद्ले बुधबारदेखि २३ खेलको पहिलो चरणको प्रशिक्षण सुरु गर्ने जानकारी दिएको हो।

त्रिपुरेश्वरस्थित राखेपको कभर्डहलमा भएको कार्यक्रमको उद्घाटन गर्दै टंकलाल घिसिङले विगतमा धेरै प्रशिक्षणहरु ठप्प झै भएको तर अब प्रशिक्षले निरन्तरता पाउने बताएका छन्। त्यस्तै राखेपले यस्ता खेलकुद प्रतियोगितालाई विशेष प्राथमिकताका साथ राख्ने र यस्ता प्रशिक्षणहरुलाई निरन्तरता दिइने र बन्द प्रशिक्षणमा अनुशासनका साथ सहभागी जनाउन उनले सबैलाई आग्रह गरे।

‘यो प्रशिक्षण एसियाडका लागि मात्र नभई अन्य राष्ट्रिय तथा अन्तराष्ट्रिय प्रतियोगिताका लागि पनि हो र यस्ता प्रशिक्षणहरु खेलाडीलाई वर्षैभरि गराइनु पर्छ,’ उनले भने। घिसिङले प्रशिक्षणको पहिलो चरणको लागि पाँच करोड छुट्याइएको बताएका छन्। र, दोस्रो चरणका लागि पनि बजेट पारित भइसकेको बताए।

कार्यक्रममा सदस्यसचिव घिसिङले २३ खेलका सबै खेल संघलाई प्रशिक्षणका लागि आवश्यक खेल सामाग्री पनि हस्तान्तरण गरेका छन्। जेठ २५ गते बाट हुने पहिलो चरणको बन्द प्रशिक्षण आषाढ २३ गते सम्म हुनेछ।

त्यस्तै, दोस्रो चरणको छनोट आषाढ २४ देखि आषाढ २७ गते सम्म हुनेछ। र, प्रशिक्षणको आन्तारिक मूल्याङ्कन आषाढ २८ देखि ३० गते सम्म हुनेछ।

२३ खेल समावेश भएको बन्द प्रशिक्षणमा २३० जना पुरुष र  २८४ जना महिला गरि जम्मा ५१४ जना खेलाडी प्रशिक्षणमा हुनेछन्। 

यता एसियन गेम्स भने यो वर्षका लागि स्थगित भएको छ। अब एसियन गेम्स अर्को वर्ष आयोजना हुने एसियाली ओलम्पिक कमिटीले जानकारी दिइसकेको छ। चीनको ग्वान्जाउमा आयोजना हुने प्रतियोगिताको नयाँ मिति भने घोषणा भइसकेको छैन।

एसियाली गेम्सका लागि खेलको बन्द प्रशिक्षण आआफ्नो संघमा हुने राखेपले जानकारी दिएको छ। बन्द प्रशिक्षणमा सहभागी हुने खेलाडीको नाम पनि सार्वजनिक भएको छ। अब आउँदो असार २३ गतेसम्म पहिलो चरणको बन्द प्रशिक्षण हुनेछ। त्यसपछि छनोट हुने राखेपले जानकारी दिएको हो।