मोटरसाइकल दुर्घटनामा प्रिन्सिपलको मृत्यु, निजी विद्यालयहरु बन्द

जनकपुरधाम- मोटरसाइकल दुर्घटनामा परि धनुषास्थित एक निजी विद्यालयका प्रिन्सिपलको ज्यान गएको छ । धनुषाको क्षिरेश्वरनाथ नगरपालिका महेन्द्रनगरस्थित जनज्योति बोर्डिङ्ग स्कुलका संस्थापक तथा प्रिन्सिपल ३९ वर्षिय प्रेमचन्द्र कुसियैत यादवको दुर्घटनामा मृत्यु भएको प्रहरीले जनाएको छ ।

यादव आइतबार साँझ आफ्नो घर सिरहाको विष्णुपुर गाउँपालिकाबाट ज १० प ८०१८ नम्बरको मोटरसाइकल चढेर महेन्द्रनगर आउने क्रममा मिथिला नगरपालिका–४ पुष्वलपुरमा दुर्घटना भएको थियो । अत्याधिक गतिका कारण अनियन्त्रित भइ मोटरसाइकल दुर्घटना भएको प्रहरीको भनाइ छ ।

दुर्घटनामा गम्भीर घाइते भएका यादवलाई उपचारको लागि जनकपुर ल्याउँदै गर्दा बाटोमा मृत्यु भएको प्रहरले जनाएको छ । यादव चढेको मोटरसाइकलले एकजना बोलबम यात्रीलाई समेत ठक्कर दिएको र उनको जनकपुर अञ्चल अस्पतालमा उपचार भइरहेको प्रहरीले बताएको छ ।

मोटरसाइकल दुर्घटनामा मृत्यु भएका संस्थापक एवम प्रिन्सिपल यादवप्रति समवेदना प्रकट गर्न धनुषाका सम्पूर्ण निजी विद्यालयहरु बन्द गरिएको छ । निजी विद्यालयहरुको संगठन एन प्याबसन र प्याबसनले संयुक्त रुपमा यादवको निधनप्रति शोक व्यक्त गर्दै विद्यालय बन्द गर्न आह्वान गरेका हुन् ।