राष्ट्रिय फुटबल टिमको अभ्यास दर्शकले हेर्न पाउने

काठमाडौं– एएफसी एसियन कप २०२३ छनोटका लागि कुवेतमा रहेको नेपाली टिमको अभ्यास सत्रमा दर्शकलाई प्रवेश दिइने भएको छ।

नेपालका लागि कुवेती प्रशिक्षक अब्दुल्लाह अल्मुताइरीले अहमादीस्थित अल शवाव स्टेडियममा हुने अभ्यासमा नेपाली दर्शकलाई आफ्नो देशको अभ्यास सत्र हेर्न दिने बताएका हुन्। 

त्यसो त खेलका क्रममा दर्शकलाई प्रवेश दिइने गरे पनि अभ्यासमा दर्शकलाई प्रवेश दिइँदैन। तर प्रशिक्षक अलमुताइरीले खेलाडीलाई हौसला दिन दर्शकलाई अनुमति दिने बताएका हुन्।

‘कुवेतमा रहेका नेपाली दर्शकलाई अभ्यासमा प्रवेश दिनेछौं। नेपाली दर्शकको उपस्थितिले खेलाडीमा हौसला वृद्धि हुनेछ,’ अब्दुल्लाहले भने, ‘नेपाली टिमले आज सोमबार साँझ ७ बजे अहमादीमै अभ्यास गर्नेछ।’ 

कतारको दोहामा केही दिनको अभ्यास र मैत्रीपूर्ण खेलपछि नेपाली टिम शनिबार कुवेतको राजधानी कुवेत सिटीमा पुगेको छ। टोलीमा २३ खेलाडी सहित नौ अफिसियल छन्। 

नेपालले कुवेतमा २५ जेठमा जोर्डन, २८ जेठमा घरेलु टोली कुवेत र ३१ जेठमा इन्डोनेसियासँग खेल्नेछ।