जन्मदिन मनाउन बोलाएर किशोरीको सामूहिक बलात्कार, आरोपमा सातजना पक्राउ

काठमाडौं– बाँकेमा १६ वर्षीया किशोरीमाथि सामूहिक बलात्कार भएको छ। फेसबुकमा एक वर्षदेखि चिनजान भएका बैजनाथ गाउँपालिका–८ का १७ वर्षीय हेमराज थारुले आफ्नो जन्मदिन मनाउन भेट्न बोलाएपछि आएकी किशोरीलाई हेमराजलगायत ७ जनाले बलात्कार गरेको बताइएको छ।

बाँके प्रहरीका अनुसार शनिबार राति र आइतबार छुट्टाछुट्टै स्थानमा किशोरीमाथि बलात्कार भएको हो। किशोरीलाई सुरुमा मानखोलाको जंगलमा ५ जना युवाले र पछि बैजनाथस्थित टहरामा लगेर दुई जना युवाले बलात्कार गरेको प्रहरीले जनाएको छ।

अचेत अवस्थामा भेटिएकी किशोरीको अवस्था अहिले ठिक भए पनि उनलाई संस्थाको संरक्षणमा राखिएको छ। प्रहरीले अभियुक्तहरू हेमराज थारु, निराजन थारु, विक्रान्त थारु, प्रवीण थारु, राजकुमार थारु, विश्वनाथ थारु र निर्देश थारुलाई विभिन्न ठाउँबाट पक्राउ गरेको छ।

अपराधबारे थप अनुसन्धान भइरहेको प्रहरीले जनाएको छ।