देशका अधिकांश स्थानमा आज वर्षा हुने

काठमाडौं- देशका केही स्थानमा आज वर्षा हुने सम्भावना छ। नेपालको पूर्वी भूभागमा मनसुनी वायुको सामान्य प्रभाव छ। पश्चिमी भूभागमा स्थानीय वायुको प्रभाव रहेको मौसम पूर्वानुमान महाशाखाले जनाएको छ।

अहिले प्रदेश नम्बर-१, वाग्मती प्रदेश र गण्डकी प्रदेशमा सामान्य बदली र बाँकी भूभागहरूमा आंशिक बदली छ। प्रदेश-१, बागमती र गण्डकी  प्रदेशका केही स्थानहरूमा वर्षा भइरहेको छ।

महाशाखाका अनुसार आज दिउँसो प्रदेश-१, मधेस प्रदेश, बागमती र गण्डकी प्रदेशमा सामान्य बदली रहनेछ। बाँकी भूभागमा आंशिक बदली रहनेछ। प्रदेश-१, बागमती र गण्डकीका केही स्थान तथा मधेस प्रदेशका थोरै स्थानमा मेघगर्जन/चट्याङसहित हल्कादेखि मध्यम वर्षाको सम्भावना छ।

राति प्रदेश-१, मधेस, बागमती र गण्डकी प्रदेशमा सामान्य बदली तथा बाँकी भूभागमा आंशिक बदली रहनेछ। प्रदेश-१, मधेस, वाग्मती र गण्डकी प्रदेशका केही स्थानहरूमा र बाँकी प्रदेशहरूका पहाडी भूभागका एक/दुई  स्थानमा मेघगर्जन/चट्याङसहित हल्कादेखि मध्यम वर्षाको सम्भावना रहेको महाशाखाले जनाएको छ।