धनगढीबाट एक हजारका ३८ थान नक्कली नोटसहित तीन महिला पक्राउ

धनगढी- कैलालीबाट एक हजारका ३८ थान नेपाली रुपैयाँसहित तीन जना पक्राउ परेका छन्। पक्राउ पर्नेमा धनगढी उपमहानगरपालिका वडा नम्बर ७ का ३५ वर्षीय सुमित्रा राना, वडा नम्बर ८ बस्‍ने ३८ वर्षीय चन्द्रा बोहरा र वडा नम्बर १४ घर भई वडा नम्बर २ सन्तोषी टोलमा डेरा गरी बस्‍ने २७ वर्षीय रितु चौधरी रहेको प्रहरीले जनाएको छ।

शुक्रबार धनगढी उपमहानगरपालिका वडा नम्बर १ स्थित हाटबजारमा सुमित्रा रानाले नक्कली रुपैयाँ लिई किनमेल गरिरहेको सूचनाको आधारमा वडा प्रहरी कार्यालय धनगढीबाट खटिएको प्रहरी टोलीले एक हजारका ३० थान नक्कली नेपाली रुपैयाँसहित पक्राउ गरेको जिल्ला प्रहरी कार्यालय कैलालीका प्रहरी नायव उपरीक्षक वेदप्रकाश जोशीले बताए। 

पक्राउ परेकाले रितु चौधरीसँग पनि नक्कली रुपैयाँ रहेको खुलेपछि उनको कोठामा पुगेको प्रहरीले ८ थान एक हजार रुपैयाँका नेपाली नोट समेत फेला परेको प्रहरी नायव उपरीक्षक वेदप्रकाश जोशीले बताए। 

पक्राउ परेकाबाट चन्द्रा बोहरा समेत कारोबारमा संलग्न भएको खुलेपछि उनलाई समेत नियन्त्रणमा लिएको जोशीले बताए। उनले सो विषयमा थप अनुसन्धान भइरहेको बताए।