फोहोर व्यवस्थापन र वातावरण संरक्षणका लागि टोल सुधार समिति गठन

काठमाडौं- बूढानीलकण्ठ नगरपालिका-१० नीलोपुल प्रगतिनगरको विकासका लागि समाजसेवी विद्या सुवेदी ज्ञवालीको संयोजकत्वमा ९ सदस्यीय टोल सुधार तदर्थ समिति गठन गरिएको छ।

फोहोर व्यवस्थापन र वातावरण संरक्षण लगायतका काम गर्न समिति गठन गरिएको हो। टोलवासीको शनिवार बिहान भएको भेलाले समितिका सदस्यमा आंनिमा शेर्पा, सुमन उप्रेती, राजन रिमाल, अविनारायण श्रेष्ठ, हरिबहादुर गुरुङ, हिमाल गुरुङ, लक्ष्मी अधिकारी र ममता पोखरेललाई चयन गरेको छ। 

रुबी टेलरिङ, राई ग्यास पसल र खनाल मेडिकलभित्र तथा धोबीखोला करिडोर उत्तर क्षेत्र समेटिएको नयाँ टोल सुधार समितिले आगामी असार मसान्त अगावै अर्को भेला बोलाई रामजी खड्का नेतृत्वको पुरानो समितिलाई आफ्नो प्रगति विवरण र हरहिसाब पेश गर्न लगाउने छ।

समितिले शान्तिसुरक्षा, फोहर व्यवस्थापन र वातावरण संरक्षण, बाटो सुधार, बिजुलीबत्ती जडान आदि कार्य गर्नाका साथै नगरपालिकाको योजनामा आफ्ना सुझाव पेश गर्ने संयोजक ज्ञवालीले जानकारी दिए।