विराटनगरमा बम विस्फोट : मेयरको गाडीमा क्षति

इटहरीः प्रदेश १ को अस्थायी राजधानी रहेको प्रदेशकै एक्लो महानगर विराटनगरमा बम फिस्फोट भएको छ । विराटनगर महानगरको नयाँ र पुरानो भवनकोबीचमा पैदल हिड्ने ठाँउमा बिस्फोट भएको हो । दिउँसो २ बजेतिर विस्फोट भएको ठाँउ मेयरको कक्ष भएको पर्खालबाट तीन मिटर मात्रै टाढा रहेको छ । 

विस्फोटले मेयरको गाडिमा सिसा फुटेर क्षति पुगेको छ भने बिस्फोट स्थलका सोफा र दराज  र आसपासका धुजाधुजा भएको महानगरका कर्मचारी धिरज राईले बताए । बिस्फोटको बारेमा हालसम्म कसैले पनि जिम्मेवारी नलिएको र कुनै पर्चाहरु नभेटिएको मोरङ प्रहरी प्रमुख एसपी मनोज कुमार केसीले बताए । घटनास्थलमै भएका एसपी केसीले हालसम्म कस्ले कुन नियतमा विस्फोट गराएको पत्ता नलागेको बताए ।  

हाल प्रहरीले बम बिस्फोटको क्षेत्रमा कसैलाइ  प्रवेश र फोटो खिच्न नदिएको पनि एसपी केसीले बताए । 

विराटनगर ७ स्थित शनिहाट क्षेत्रमा रहेको महानगरमा भएको बिस्फोटले कुनै मानविय क्षति भने नभएको महानगरले जनाएको छ । बम फिस्फोट भएको क्षेत्र प्रहरी पोस्टबाट साढे १ किलोमिटर मात्रै टाढा छ ।