यू-१९ महिला विश्वकप छनोटमा कतारविरुद्ध नेपालको सानदार जित

काठमाडौं- मलेसियामा आजबाट आईसीसी यू १९ महिला विश्वकपको छनोट खेल सुरु भएको छ। अन्तर्राष्ट्रिय क्रिकेट काउन्सिल (आईसीसी)ले पहिलो पटक आयोजना गरेको यू १९ को महिला विश्वकप छनोटका लागि एसियाली छनोट सुरु भएको हो।

नेपालले छनोटको पहिलो खेलमा कतारको यू १९ महिला टिमलाई ७९ रनले हराएको छ। विश्वकप छनोटमा गएको मे ३१ मा नेपालबाट बिदाइ भएको टिमको कप्तानी कृतिका मरासिनीले गरेकी छन्।

यसअघि पनि यू १९ को राष्ट्रिय टिममा समावेश भइसकेकी कृतिले नेपाली टिम विश्वकपका पुग्ने बताएकी छन्। नेपालले आज सम्पन्न खेलमा ७९ रनको सानदार जित निकालेको छ।

पहिले ब्याटिङ गरेको नेपालले पूरा ओभर खेल्दै तीन विकेट गुमाएर ११७ रन बनाएको थियो। जवाफमा कतार १५ ओभर चार बेल खेल्दै ३८ रन बनाएर अलआउट भयो। नेपाली टिमका मुख्य प्रशिक्षक रमेश रिजालले पनि नेपाल विश्वकपमा पुग्ने दाबी गरेका छन्। 

सन् २०२३ को जनवरीमा दक्षिण अफ्रिकामा हुने विश्वकपमा १६ टिमको सहभागिता रहनेछ भने कूल ४१ खेल हुनेछन्। यसअघि यो प्रतियोगिता सन् २०२१ मा आयोजना हुने तय थियो। तर कोभिड १९ को महामारीका कारण दुई वर्ष पछि धकेलिएको हो।

नेपालले जुन ४ मा यूएईसँग खेल्नेछ भने जुन ६ मा नेपाल भुटानको खेल रहेको छ। नेपालले चौथो खेल थाइल्यान्डसँग जुन ७ मा खेल्नेछ भने मलेसियासँग अन्तिम खेल जुन ९ मा खेल्ने तालिका रहेको छ। राउन्ड रोबिनबाट सबैभन्दा उत्कृष्ट एक टिम यो  छनोटबाट विश्वकपमा पुग्नेछ।