नेसन्स लिग : हारबाट जोगियो पोर्चुगल, हाल्यान्डको गोलमा नर्वेको जित

काठमाडौं- युरोपको नेसन्स लिगअन्तर्गत बिहीबार राति पाँच खेल सम्पन्न भएका छन्। त्यसमध्येको पहिलो खेलमा स्पेनसँग पोर्चुगल मुस्किलले हारबाट जोगिएको छ।

स्पेनको बेनिटो भिल्लामरिनमा सम्पन्न खेलको २५औं मिनेटमै अल्भेरो मोराटाले गोल गरेका थिए। यससँगै पोर्चुगल एक गोलले पछि थियो।

खेल अवधिभर ३९ प्रतिसत समय मात्र बल नियन्त्रणमा राख्न सकेको पोर्चुगलका लागि ८२औं मिनेटमा रिकार्डो होर्टाले गोल गरेका थिए। यससँगै पोर्चुगलले स्पेनसँग बराबरी गर्दै समुह बीमा १-१ अंक बाँडेका हुन्।

समूह बी कै अर्को खेलमा चेक गणतन्त्रले स्विट्जरल्यान्डलाई हराएको छ। इडेन एरिनामा सम्पन्न खेलमा चेक गणतन्त्रले स्विट्जरल्यान्डमाथि २-१ को जित निकालेको हो।

१-१ को बराबरी भएको अवस्थामा स्विट्जरल्यान्डका डिजिब्री सोले आत्मघाति गोल गरेपछि खेल चेक रिपब्लिको पक्षमा गएको हो। यससँगै चेक रिपब्लिक समूह बीको शीर्षस्थानमा छ भने स्विट्जरल्यान्ड पुछारमा छ।

यता, समूह चारको लिग बीअन्तर्गतको खेलमा नर्वेले सर्वियालाई १-० ले हराएको छ। इर्लिङ हाल्यान्डले खेलको २६औं मिनेटमा गोल गरेसँगै अग्रता बनाएर नर्वेले जित निकालेको हो।

सोहि समूहको अर्को खेलमा स्विडेनले स्लोवेनियाँलाई २-० गोलले हराएको छ। र, अहिले ३ अंककासाथ स्विडेन समूह ४ लिग बीको शीर्षस्थानमो छ भने नर्वे दोस्रो स्थानमा छ। नेसन्स लिगको अर्को खेलमा भने ग्रिसले दक्षिणी आयरल्यान्डविरुद्ध १-० को जित निकालेको छ।