निजगढमा अन्तर्राष्ट्रिय विमानस्थल निर्माण गर्न मधेशका सांसदको माग

जनकपुर- मधेश प्रदेशका प्रदेशसभा सदस्यले प्रस्तावित निजगढ अन्तर्राष्ट्रिय विमानस्थलको निर्माणको काम अघि बढाउन माग गरेका छन्। बिहीबारदेखि सुरु भएको मधेश प्रदेशसभाको नवौँ अधिवेशनमा उहाँहरूले निजगढ विमानस्थलको विषय मधेश प्रदेशको आर्थिक समृद्धि र जनताको जीवनस्तरसँग प्रत्यक्ष जोडिएकाले निर्माण काम अघि बढाउन माग गरेका हुन्। 

'प्रस्तावित निजगढ विमानस्थल मधेश प्रदेश जनताको आर्थिक समृद्धिसँग जोडिएको छ,' प्रदेशसभा सदस्य तथा लोकतान्त्रिक समाजवादी पार्टी संसदीय दलका नेता जितेन्द्र सोनलले भने, 'निजगढ विमानस्थल निर्माण भएपछि यहाँको आर्थिक समृद्धि हुन्छ, रोजगारी सिर्जना हुन्छ।'

प्रदेशसभा सदस्य तथा प्रदेश सरकारका उद्योग, वन तथा पर्यटनमन्त्री सत्रुधन महतोले व्यापक अध्ययनबाट पनि निजगढमा अन्तर्राष्ट्रिय विमानस्थल बनाउँदा उपयुक्त हुने निष्कर्षका साथ निर्माण गर्ने योजना तयार भएको उल्लेख गर्दै निजगढ विमानस्थलको काम अघि बढाउन माग गरे। 

'निजगढमा अन्तर्राष्ट्रिय विमानस्थल निर्माणको सम्भाव्यता अध्ययनका क्रममा पर्यावरणीय संरक्षणको कुरा पनि उठ्यो,' मन्त्री महतोले भने, 'तर विमानस्थल निर्माण गर्दा धेरै रुख काटिन्छ, पर्यावरणमा असर पर्छ भन्ने कुरालाई जसरी भयावह बनाइएको छ वास्तविक रूपमा त्यस्तो छैन।'

नेकपा एकीकृत समाजवादी प्रदेश संसदीय दलका नेता समेत रहनुभएका मन्त्री महतोले भने, 'विनाश नगरी विकास हुँदैन, नभत्काई नयाँ बन्छ? त्यसैले विकास गर्न केही विनाश गर्नुपर्छ।' मधेश प्रदेशको लाइफलाइनका रूपमा रहेको निजगढ विमानस्थल निर्माणका लागि थोरै जङ्गलै फडानी गरेर भए पनि काम अघि बढाउनुपर्ने उहाँको भनाइ थियो। 

नेकपा एमाले प्रदेश संसदीय दलका नेता रामचन्द्र मण्डलले प्रदेशको आर्थिक समृद्धि, रोजगारी र पहिचानसँग प्रत्यक्ष जोडिएको निजगढ विमानस्थल निर्माणका लागि दबाब सिर्जना गर्नुपर्ने बताए। 

नेकपा (माओवादी केन्द्र) का नेता तथा प्रदेशसभा सदस्य दिलीप साहले निजगढ विमानस्थल मधेश प्रदेशको मेरुदण्डका रूपमा रहेकाले यसलाई जसरी पनि अघि बढाउनुपर्ने माग गरे। उनले निजगढ विमानस्थल निर्माण भएपछि मधेश प्रदेशको विकास र समृद्धिको यात्राले गति लिने विश्वास व्यक्त गरे।