देवदहको कार्यपालिकामा एमाले–राप्रपा गठबन्धन विजयी

बुटवल– रुपन्देहीको देवदह नगरपालिकामा एमाले र राष्ट्रिय प्रजातन्त्र पार्टीको गठबन्धनका उम्मेवार कार्यपालिकामा निर्वाचित भएका छन्।

५ जना महिला सदस्य र दलित तथा अल्पसंख्यकबाट ३ जना गरी ८ जना कार्यपालिका सदस्यको लागि नेकपा एमाले र राप्रपाबीच गठबन्धन बनेको हो। एमालेबाट ७ जना र राष्ट्रिय प्रजान्त्र पार्टीबाट १ जना निर्वाचित भएका हुन्।

महिला सदस्यमा नेकपा एमालेकी गीता भण्डारी, टिकीसरा सुनार, रुपाकुमारी ढुंगाना, लक्ष्मी विक, शान्ता भट्टराई कार्यपालिका सदस्यमा निर्वाचित भए। दलित तथा अल्पसंख्यकतर्फ एमालेका कुमार दमाई, गोविन्द पासी र राष्ट्रिय प्रजातन्त्र पार्टीका ओमबहादुर परियार निर्वाचित भएको निर्वाचन अधिकृत विष्णुप्रसाद आचार्यले बताए।

देवदह नगरपालिकाको कार्यपालिकामा २२ जना हुनुपर्ने भएपनि स्थानीय तहको निर्वाचनबाट १४ जना यसअघि नै निर्वाचित भइसकेका थिए।  बाँकी रहेको ८ जनाको लागि बुधबार निर्वाचन भएको हो।

देवदह नगरपालिकामा नेकपा एमालेका ३२ जना, नेपाली कांग्रेसका २१ जना राष्ट्रिय प्रजातन्त्र पार्टीको ९ जना गरी ६२ जना सदस्य निर्वाचित भएका थिए। देवदहको मेयर र उपमेयर दुबै पद एमालेले जितेको छ। यहाँ नेपाली कांग्रेस र माओवादीबीच गठबन्धन भएको थियो।