क्यानविरूद्ध ईपीएलले दायर गरेको मुद्दामा कारण देखाउ आदेश

काठमाडौं– नेपाल क्रिकेट संघ (क्यान) ले आयोजना अनुमति नदिएको भन्दै एभरेष्ट प्रिमियर लिग (ईपीएल)ले दायर गरेको मुद्दामा सर्वोच्च अदालतले कारण देखाउ आदेश दिएको छ। 

सोमबार सर्वोच्चका न्यायाधीश विश्वम्भरप्रसाद श्रेष्ठले आज मुद्दाको सुनुवाइ गर्दै कारण देखाउ आदेश दिएका हुन्। ईपीएलले भने अन्तरिम आदेश माग गरेको थियो। यसका लागि भने सर्वोच्चले अर्को छलफलका लागि बोलाएको छ।

यसअघि क्यानले देशको एउटामात्र आधिकारिक लिग हुने बताउँदै अरू लिगलाई राष्ट्रिय मान्यता नदिने स्पष्ट पारेको थियो। साथै, क्यानले आगामी असोजमा हुने नेपाल टी २० लिगका ६ वटा टिमसमेत घोषणा गरेको थियो।

क्यानले अरू लिगलाई क्षेत्रीय मान्यता दिन भने सकिने बताएको छ। तर ईपीएएलले आफूले लिग सञ्चालनका लागि अनुमति पाउनुपर्ने माग दोहोर्‍याउँदै राष्ट्रिय खेलकुद परिषद्, नेपाल क्रिकेट संघ, क्यानका अध्यक्ष चतुर बहादुर चन्द, युवा तथा खेलकुद मन्त्रालय सिंहदरबार र  गुरुग्राम हरियाणास्थित सेभेन थ्री स्पोर्ट्सलाई विपक्षी बनाएर मुद्दा दायर गरेको थियो।