त्रियुगा नगरपालिकाको मेयरमा कांग्रेसका बस्नेत निर्वाचित

काठमाडौं– उदयपुरको त्रियुगा नगरपालिकाको मेयरमा नेपाली कांग्रेसका उम्मेदवार वसन्त बस्नेत निर्वाचित भएका छन्।

सोमबार सम्पन्न मतगणनाअनुसार उनी नेकपा एमालेका भागवत राउतलाई २ हजार ८६ मतले पराजित गर्दै मेयरमा निर्वाचित भएका हुन्। उनले १३ हजार ९५९ मत पाए भने एमालेका राउतले ११ हजार ८७३ मत हात पारे।

नेकपा एकीकृत समाजवादीका बलदेव चौधरीले तेस्रो नम्बरमा रहेर ९ हजार १४७ मत पाए। उपमेयरमा भने एमालेकी उम्मेदवार महेश्वरी राई निर्वाचित भएकी छन्। उनले १३ हजार ७०३ मत पाएकी छन्। उनकी निकटतम प्रतिस्पर्धी कांग्रेसकी उम्मेदवार सरिता राईले ११ हजार ९८१ मत पाइन्।

त्यस्तै, नेकपा माओवादी केन्द्रकी उम्मेदवार गीता खड्काले ६ हजार ५६८ मत पाइन्। त्यहाँ माओवादी र एकीकृत समाजवादीले तालमेल गरेका थिए।

त्रियुगाको परिणाम आएसँगै देशभरका ७५२ वटा स्थानीय तहको मतगणना सम्पन्न भएको छ। अब बाजुराको बुढीगंगा नगरपालिकाको मात्रै परिणाम आउन बाँकी छ। त्यहाँ पुनः मतदान गर्ने निर्वाचन आयोगले निर्णय गरेको छ।

गत वैशाख ३० गते शुक्रबार देशभर एकै चरणमा स्थानीय निर्वाचन भएको थियो।