प्रस्तावित गेटा मेडिकल कलेजको चौरमा स्वास्थ्य सेवा सञ्चालन गरेर सांकेतिक विरोध

काठमाडौं- नेपाल सरकारले मंगलबार सार्वजनिक गरेको नीति तथा कार्यक्रममा गेटा मेडिकल नसमेटिएको भन्दै स्थानीय आन्दोलित बनेका छन्। उनीहरूले सरकारविरुद्ध चरणबद्ध रूपमा आन्दोलन गरिरहेका छन्।

धनगढी र अत्तरियाका स्थानीयले स्व:स्फूर्त रूपमा छुट्टाछुट्टै आन्दोलन गरिरहेका हुन्। मेडिकल कलेज सञ्चालनका लागि  भौतिक संरचना तयार रहे पनि नीति तथा कार्यक्रममा समावेश नभएको भन्दै सुदूरपश्चिमवासी आन्दोलित बनेका हुन्।

बिहीबार बिहान धनगढीमा गेटा मेडिकल सञ्चालनको पक्षमा हस्ताक्षर संकलन थालिएको थियो। हस्ताक्षर संकलनपछि प्रधानमन्त्री, अर्थमन्त्री र स्वास्थ्यमन्त्रीलाई उक्त हस्ताक्षर प्रमुख जिल्ला अधिकारमार्फत पठाइएको नेपाली कांग्रेस कैलालीका सचिव नृप सुनारले बताए।

त्यस्तै आज शुक्रबार बिहान ८ देखि १० बजेसम्म गेटा मेडिकल कलेजमा पुगेर प्लेकार्डसहित धर्ना दिइने कार्यक्रम रहेको उनले बताए। 'आज गेटा मेडिकल कलेजको खुला चौरमा बिहान ८ बजेदेखि सांकेतिक विरोध स्वरुप नागरिक स्तरबाट स्वास्थ्य सेवा परीक्षण तथा विरोध कार्यक्रम गर्ने छौं। संघीय संसद्को चालू अधिवेशनमै गेटा मेडिकल कलेज कानुनी हैसियत स्पष्ट गर्न नीतिगत व्यवस्था गर्न माग गर्दछौं,' उनले भने। उनले आफूहरूको माग सम्बोधन नभए आन्दोलनलाई थप सशक्त पारिने चेतावनी दिएका छन्।