भोजपुर नगरको पहिलो निर्णय : विपन्नका लागि पानी र बिजुली मिटर जडान निःशुल्क

काठमाडौं- भोजपुर नगरपालिकाका मेयर कैलाशकुमार आलेले पदभार ग्रहण गरेका छन्। दोस्रो पटक मेयरमा निर्वाचित भएका आलेले पदभार ग्रहण गर्दै अतिविपन्न नागरिकहरुलाई निःशुल्क पानी र बिजुली मिटर जडान गर्ने निर्णय गरेका छन्। 

यस्तै ६० वर्षभन्दामाथिका ज्येष्ठ नागरिक र प्रसूति सेवाका लागि निःशुल्क एम्बुलेन्स सेवा निःशुल्क प्रदान गर्ने निर्णय नगरपालिकाले गरेको छ। सदरमुकाम र आसपासमा अव्यवस्थित विद्युतको तार हटाएर एबीसी केवल लगाउने निर्णय समेत गरिएको छ। 

‘विपन्नताका कारण नगरभित्रका कतिपय घर परिवार खानेपानी तथा विद्युत सेवाको पहुँचमा नभएकाले परिवारलाई खानेपानी र विद्युत जडानको व्यवस्था नगरपालिकाले गर्नेछ,’ आलेले भनेका छन्,  ‘६० वर्षभन्दा माथिका ज्येष्ठ नागरिक र प्रसूति सेवाका लागि निःशुल्क एम्बुलेन्स सेवा र विद्युतीय दुर्घटनालाई मध्यनजर गर्दै बजार क्षेत्रमा अव्यवस्थित विद्युतका तार हटाएर विद्युत प्राधिकरणको समन्यवमा एबीसी केवुलमार्फत् विद्युत लाइन व्यवस्थित गरिने छ।’