पोखरामा नेकपा (एस) का आचार्य जित नजिक

काठमाडौं– पोखरा महानगरपालिकाको मतगणना करिब ७५ प्रतिशत सकिएको छ। मेयरमा सत्तारुढ गठबन्धनबाट मेयरका प्रत्यासी नेकपा एकीकृत समाजवादीका धनराज आचार्य झन्ड‌ै ३ हजार ३ सय मत नेकपा एमालेका कृष्ण थापाभन्दा अघि छन्। 

एमालेले साविक जितेका वडा पनि गुमाएको छ। एमालेकै गढ मानिएका वडाबाट मेयरमा धनराजले मत पाएका छन्। उपमेयरकी उम्मेदवार एमालेकी मञ्जुदेवी गुरुङ पनि कांग्रेसकी कोपिला रानाभाटभन्दा पछि परेकी छन्। 

आइतबार दिउँसोसम्म एमालेले १, ५, ६, ८, १५, २० र २९ नम्बर वडा जितेको छ। यीमध्ये ६ नम्बर वडा पहिला कांग्रेसले जितेको वडा हो। कांग्रेसले २, ३, ४, ७, ९, १०, १२, १३, १४, २३, २४, २५, २६, २७, २८ र ३० जितेको छ। यीमध्ये ७, १३, २४, २५, २६, २८ र ३० यसअघि एमालेले जितेका वडा हुन्।

हाल ११, १६, १७, १८, १९, २१, २२, ३१, ३२ र ३३ नम्बर वडाको गणना भइरहको छ। यीमध्ये ११ र ३२ मात्रै कांग्रेसले जितेका वडा हुन्। गन्न बाँकी रहेका वडालाई एमालेको प्रभावशाली वडाको रुपमा लिइए पनि हाल मेयरमा धनराजले अग्रता लिइरहेका छन्। अग्रता धेरै हुने ठानिएको वडामा पनि थापाले मतान्तर धेरै बनाउन नसकेका कारण आचार्यको जित निश्चितजस्तै भएको छ।

आइतबार दिउँसोसम्म १ लाख ४ हजार २ सय १२ मतगणना हुँदा धनराजले ४१ हजार ७ सय ५ र कृष्ण थापाले ३८ हजार ३ सय १० मत पाएका छन्। उपमेयरमा भने एमालेकी मञ्जुदेवी गुरुङले ४३ हजार ६ सय १६ मत ल्याउँदा कांग्रेसकी कोपिला रानाभाटले ४१ हजार ९ सय २० मत प्राप्त गरेकी छन्।