कपिलवस्तुको बुद्धभूमिमा कांग्रेसका प्रमुख र उपप्रमुख निर्वाचित

बुटवल– कपिलवस्तुको बुद्धभूमि नगरपालिकामा नेपाली कांग्रेसका नगर प्रमुखमा केशवकुमार श्रेष्ठ र नगर उपप्रमुखमा कांग्रेसकै मीरा थारुले चुनाव जितेकी छन्।

नगर प्रमुख जितेका श्रेष्ठले १४ हजार ३ सय ८४ मत ल्याई चुनाव जितेका हुन्। निकटतम प्रतिस्पर्धाी रहेका नेकपा एमालेका उम्मेदवार पिताम्बर खनालले १३ हजार ५ सय ९६ मत प्राप्त गरे। श्रेष्ठले खनाललाई ७ सय ८८ मतान्तरले पराजित गरे। नगर प्रमुखमा जनता समाजवादी पार्टी (जसपा) का उम्मेदवार शिवलाल यादवले १ हजार २ सय २८ मत ल्याए। 

त्यसैगरी नगर उपप्रमुख थारुले १४ हजार २ सय ८३ मत प्राप्त गरी चुनाव जितिन्। उनकी प्रतिस्पर्धी एमालेकी उम्मेदवार मञ्जु चौधरीले १३ हजार ७ सय १५ मत प्राप्त गरिन्। 

निर्वाचन जितेका प्रमुख श्रेष्ठ र उपप्रमुख थारुले २०७४ को स्थानीय तहको निर्वाचन समेत जितेका थिए। बुद्धभूमि नगरपालिकामा नेपाली कांग्रेसले नगर प्रमुख र उपप्रमुख सहित ५ वटा वडा जितेको छ। १० वटा वडा रहेको नगरपालिकामा नेकपा एमालेले ४ वटा वडा र जसपाले एउटा वडा जित्न सफल भएको छ।