भरतपुर- चितवनको भरतपुर महानगरपालिकामा यतिबेला वडा नम्बर ९ र १० को मतगणना चलिरहेको छ। हालसम्म गणना भएका ८ वटा वडामध्ये गठबन्धनका तर्फबाट नेपाली कांग्रेसले ६ वटा वडा, समाजवादीले एक र नेकपा एमालेले एक वडामा जित हासिल गरेको छ।
महानगरमा हालसम्म करिब ४२ हजार ४५३ मत गणना हुँदा गठबन्धनकी रेनु दाहालले ३ हजार २ सय १४ बढी मतले एमालेका विजय सुवेदी भन्दा अघि छन्। एमालेका विजय सुवेदीले १२ हजार ९०९ मत ल्याएर रेणुलाई पछ्याइरहेका छन्। गणनाको सुरुवाततिर एकअर्कालाई अघिपछि पारेका वडा नम्बर ५ को गणनापछि रेणुको अग्रतामा अंक थपिने क्रम जारी छ। त्यस्तै स्वतन्त्रबाट उम्मदेवार दिएका जगन्नाथ पौडेलको ६ हजार ६४७ मत पुगेको छ।
भरतपुरमा एमालेले अपेक्षा गरेअनुसार मत नपाएपछि चुनाव जित्नेमा ढुक्क छैन। गठबन्धनपछि असन्तुष्ट बनेको कांग्रेसको मत स्वतन्त्रबाट उठेका जगन्नाथ पौडेलको पोल्टामा गएपछि एमालेको निराश बनेको हो। गठबन्धनले भने जगन्नाथ पौडेलेले कांग्रेसको भोट काटेपनि आफूहरूलाई धेरै घाटा नभएको दाबी गर्दै आएको छ। वडामा कांग्रेसले सन्तोषजनक सिट जितेको छ। वडाका हकमा स्वतन्त्र (बागी) उम्मेदवार पौडेलले पनि रुख चिह्नमा उठेका उम्मेदवारलाई नै भोट मागेका कारण कांग्रेसले वडामा राम्रै मत संकलन भएको छ।
एमालेले आशा गरेको वडा पनि गुमाएको छ। एमालेले अब वडा नम्बर १०, ११ र १२ को वडाबाट अहिलेसम्मको घाटा पूर्ति गर्ने लक्ष्यमा एमाले देखिएको छ। उक्त वडाबाट अहिलेको घाटालाई पुर्ने र अन्य वडामा अग्रता लिने बताएको छ। यता गठबन्धनको पनि उक्त वडामा आफ्नो बचत मतबाट केही कमी हुने भएपनि घाटामा नजाने र पछाडिका वडाले प्लस गर्दै लैजाने दाबी छ।
एमाले उम्मेदवार विजय सुवेदीले आफूहरूले पुनः लिड गर्ने दाबी गरेका छन्। तर यो बेलासम्म रणुको अग्रता ३ हजार भन्दा पनि माथि पुगेकाले त्यसलाई उल्टाउने गरी मत आएन गाह्रो छ। 'मेरो विचारमा वडा नम्बर ११ र १२ मा पुग्दा एमालेको मत बढ्नेछ। त्यसपछि १३ र १४, १५ मा मत घट्छ र १६, १७ र १८ मा फेरि सूर्यको मत बढ्छ। त्यसपछि लगातार आफ्नो पक्षमा आउँछ भन्नेमा विश्वस्त छु,' सुवेदीले दाबी गरे। तर गठबन्धनले व्यापक आर्थिक चलखेल गरेको उनको दाबी छ।
गठबन्धनकी उम्मेदवार रेणु भने 'आफू कमजोर हुन्छु' भन्ने लागेको स्थानमा पनि अग्रता बनाएको भन्दै उत्साहित छन्। एमालेले आफ्नो पक्षमा ल्याउने भनेका वडामा पनि आफू कमजोर नहुने उनको दाबी छ। यसअघिका वडाबाट पनि एमालेका मतदाताले आफूलाई मत दिएकाले त्यस्तै ट्रेन्ड एमाले बलियो भनिएका वडामा पनि हुने उनको तर्क छ। 'वडा नम्बर १०, ११ र १२ मा खतरा छ भन्ने मलाई लाग्दैन। भरतपुरका मतदाताले एकभोट रेनुलाई भनेर मत दिएका छन्। कतिपय वडामा सोचेभन्दा राम्रो भएको छ। वडा नम्बर १०,११ र १२ मा पनि हामी माइनसमा हुँदैनौं,' रेणु भन्छिन्, 'विगतको कामको हिसाबले अझ धेरै मत आउँछ भन्ने अपेक्षा थियो। तर यहाँ सोचेको भन्दा नराम्रो भयो भन्ने अवस्था छैन।'
गणनामा खटिएका प्रतिनिधिहरूले नगर प्रमुखमा एमालेले अब जित्न नसक्ने बताउन थालिसकेका छन्। 'कतिपय मतपत्र यस्ता पनि छन् कि मेयरको एक भोट हँसिया-हथौडामा छ। बाँकी सबै भोट सूर्यमा गएको छ। यस्तो मतपत्र प्रत्यक्ष देखेपछि नगरप्रमुखमा हाम्रो अवस्था कमजोर हुने आकलन भइहाल्यो,' गणनामा खटिएका एक एमाले प्रतिनिधिले भने, 'अब हाम्रो आशा वडातिर मात्र अघि बढेको छ। हालसम्मका वडामा पनि सन्तोषजनक मत आएन। यसले अब बाँकी र हाम्रा लागि राम्रा भनिएका वडामा पनि यसै भन्न सकिने अवस्था छैन। तैपनि आशा गरौँ वडामा हामी जित्छौँ।'
वडा नम्बर ९ र १० को मतगणना चलिरहँदा भरतपुरका मेयरका मुख्य प्रतिस्पर्धी सत्ता गठबन्धनबाट माओवादीकी रेणु र एमाले-राप्रपा गठबन्धनबाट एमालेका विजयसँग हामीले संक्षिप्त कुराकानी गरेका छौँ।