स्याङ्जाको वालिङमा मेयर एमाले उपमेयर कांग्रेस निर्वाचित

काठमाडौं– स्याङ्जाको वालिङ नगरपालिकाको मेयरमा एमाले र उपेमयरमा नेपाली कांग्रेस विजयी भएको छ। मेयरमा एमालेका कृष्ण खाँण र उपमेयरमा नेपाली कांग्रेसकी कविता तिवारी गैह्रे विजयी भएका हुन्।

एमालेका कृष्ण खाँणले नेपाली निवर्तमान मेयरसमेत रहेका कांग्रेसका दिलीपप्रताप खाँणलाई २१८० मतान्तरले पराजित गरेका हुन् । कृष्ण खाँणले १३ हजार ७७६ मत ल्याउँदा दिलीपप्रताप खाँणले ११ हजार ५९६ मत ल्याए ।

उपमेयरमा भने कांग्रेसकी कविता तिवारी गैह्रेले ४८२ मतान्तरले एमालेकी खगिसरा थापालाई पराजित गरेकी छन् । तिवारीले १२ हजार ८२२ मत ल्याउँदा उनकी प्रतिस्पर्धी थापाले १२ हजार ३४० मत पाइन् । पराजित थापा २०७४ को चुनावमा पनि यही पदमा उम्मेदवार थिइन् ।

१४ वडामध्ये नेकपा एमालेले ३, ४, ६, ७, ८, ९, १२, १३ गरी ८ वडामा विजयी भएको छ भने नेपाली कांग्रेस १, २, ५, १०, ११, १४ वडामा विजयी भयो । निर्वाचनकै दिन यहाँ जिप दुर्घटना हुँदा १४ जनाले ज्यान गुमाएका थिए।