धुलिखेलको मतगणना रोकियो

काठमाडौं- धुलिखेल नगरपालिकाको मतगणना रोकिएको छ। उम्मेदवार नभएको चिह्नको मत सदर वा बदर गर्ने भन्ने विषयमा विवाद भएपछि मतगणना रोकिएको हो।

मतगणना सुरु हुनुअघि दलहरुसहितको बैठकले एउटै पदमा उम्मेदवार नउठेको र उठेको पदमा दुवैमा छाप छ भने उम्मेदवार भएको पदमा त्यो संकेत सदर मान्ने निर्णय भएको थियो। सोही अनुरुप वडा नम्बर ८ सम्मको मतगणना भइसकेको छ।

यसअघि प्रमुख पदमा उम्मेदवार नभएको रुख र अन्य कुनै चिह्नमा संकेत भएको पाइए सो मत सदर गरिँदै आएको थियो। वडा नम्बर ९ को मतगणना सुरु गर्ने तयारी गरेपछि भने एमालेले सो नियम मान्न नसकिने भन्दै अर्को नियम बनाएर गणना गर्नुपर्ने अडान राखेको छ। कांग्रेस, स्वतन्त्र लगायतका उम्मेदवारले भने एउटै नियम अनुसार बाँकी मत गणना हुनुपर्ने बताएका छन्।

विवाद भएपछि दलका जिल्लास्थित प्रमुख, उम्मेदवारसहितको बैठक बसिरहेको छ। बैठकले मापदण्ड बनाएपछि गणना सुरु हुने बताइएको छ।