निर्वाचन अधिकृत फेरिएपछि झापाको शिवसताक्षीमा दुई दिनदेखि रोकिएको मतगणना सुरु

काठमाडौं– झापाको शिवसताक्षी नगरपालिकामा दुई दिनदेखि रोकिएको मतगणना पुनः सुरु भएको छ। वडा नम्बर–१ को मतगणना गर्दा ५४ वटा मतपत्र हराएको भन्दै नेकपा माओवादी केन्द्रका वडाध्यक्षका उम्मेदवार दुर्गा नेम्वाङले आपत्ति जनाएपछि त्यहाँ मतगणना रोकिएको थियो।

दलहरुले पुनः मतगणनाको मागलाई निर्वाचन आयोगमा पत्राचार गर्ने सहमति भएपछि त्यहाँ दिउँसो २ बजेबाट मतगणना सुरु भएको स्थानीय पत्रकार विनोद सापकोटाले जानकारी दिए। अहिले त्यहाँ मतदातालाई देखाएरै मतगणना भइरहेको छ। 

त्यस्तै तत्कालिन निर्वाचन अधिकृत ऋषि पौडेलको लापरबाहीका कारण विवाद निम्तिएको आरोप लागेपछि त्यहाँ अहिले निर्वाचन अधिकृत पनि फेरिएका छन्। उनको ठाउँमा नयाँ अधिकृत मधु पोखरेल गणनाका लागि आएका छन्। 

खसेको मत र गणना भएको मतमा फरक आएपछि आइतबार रातिबाटै झापाको शिवसताक्षीमा मतगणना रोकिएको थियो।  त्यहाँ माओवादी कार्यकर्ताले नारावाजी समेत गरेका थिए। त्यहाँ एमालेको प्यानल नै विजयी भइसकेको छ। विजयी भइसकेपछि मात्रै मतपत्र हराएको खबर बाहिरिएको थियो। 

विवादित भएको उक्त वडामा तीन हजार ८२ मत खसेको मुचुल्का छ। तर, मतगणनाका बेला भने तीन हजार २८ मतपत्र मात्र भेटिएको थियो।