धनगढीमा स्वतन्त्र उम्मेदवार गोपाल हमाल दोब्बर मतले अगाडि

काठमाडौं– कैलालीको धनगढी उपमहानगरपालिकाको मेयरमा स्वतन्त्र उम्मेदवार गोपाल हमालले दोब्बरभन्दा बढी मतले अग्रता कायम गरेका छन्।

कांग्रेस, माओवादी केन्द्र, नेकपा एकीकृत समाजवादी र जनता समाजवादी पार्टीको गठबन्धनबाट नेपाली कांग्रेसका वर्तमान मेयर नृपबहादुर वड उनका निकटम प्रतिद्वन्द्वी हुन्। हमालले ७ हजार ८१६ मत प्राप्त गर्दा वडले ३ हजार ८७२ मतमात्रै प्राप्त गरेका छन्। 

२० हजार मतगणना हुँदा हमालले ३ हजार ९ सय ४४ ले अग्रता कायम गरेका छन्। एमालेका तर्फबाट मेयरका प्रत्यासी रणबहादुर चन्दले १ हजार ९२१ मत प्राप्त गरेका छन्। उपमेयरमा भने सत्ता गठबन्धनबाट नेकपा माओवादी केन्द्रकी उम्मेदवार शान्तिकुमारी अधिकारीले ३ हजार ४१६ मत पाएकी छिन्। एमालेकी कन्दकलाकुमारी रानाले ३ हजार ३०७ मत र स्वतन्त्र उम्मेदवार प्रभाकर भण्डारीले १९०० मत पाएका छन्।

२०७४ को निर्वाचनमा यहाँ कांग्रेसले एकलौटी रुपमा जितेको थियो। त्यसबेला हमालले दोस्रो स्थान लिएका थिए। यसपटक कांग्रेसले अरु तीन दलसँग गठबन्धन गरेको छ। तर, पनि हमालले अग्रता बनाएका छन्। उद्योग वाणिज्य संघको अध्यक्ष भएर काम गरिसकेका हमाल सामाजिक कार्य गरेर लोकप्रिय छन्।